早年與女星何佩瑜（Jeana）推出寫真的女模余曉彤（Hidy），去年為消防員老公劉健明誕下囡囡Willa，升呢做媽咪。坐月後火速復工的她大談分娩過程，笑言初入院時「未驚過」：「一開始冇乜事，輕微地痛，入到院見到其他媽媽喺度喊就打畀老公，仲笑嗰啲媽媽居然喊，點知去到夜晚就到我喊！」

Hidy重提分娩經驗，做人阿媽真係唔簡單！

她以「沒有最痛，只有更痛」來形容陣痛：「係一級級咁痛上嚟，5分鐘痛30秒，跟住1分鐘痛30秒，真係喊出嚟！」去到產房時，她吸「笑氣」紓緩痛楚，提起時仍心有餘悸：「護士話我吸到唔識呼出嚟，當時老公教我要好似潛水咁，一呼一吸，但我冇心情同佢講潛水！」不過，B女出世後苦盡甘來，她難忘乖女出生那一刻的感動：「一生完就冇嘢，望住佢想講：『你都幾犀利，得嗰咁細粒，但同我做咗咁多嘢！』」