擔任電影《同班同學》女主角的新人演員麥芷誼,平日為生活努力上班賺錢,同時繼續追逐演藝夢。她自爆去年在處女作《同》片的大膽裸露戲份是先斬後奏,一度很擔心家人介意,豈料媽媽的鼓勵令她暖入心!

Koyi膽粗粗拍下裸露戲,幸而家人不反感,更全力支持!

麥芷誼毅然放棄正職,只為在星途闖出一番事業!

時裝設計系畢業的Koyi努力追夢,不想成為家人的負擔。

香港理工大學時裝設計系畢業的麥芷誼(Koyi),為追夢不惜辭去正職,去年接拍處女作《同班同學》,她說:「想喺演藝圈發展,所以辭咗職,但始終要有收入維持生活。坦白講,依家仲係新人,屋企人又唔係億萬富翁,讀大學借嘅學費都未還完,冇理由仲要依賴屋企照顧。既然演戲係自己想做嘅職業,咁我都要為追夢負責任,起碼唔會成為屋企負擔!依家喺呢行發展只係年幾,都算有少少成績,拍咗《同》片做到女主角,都算係打咗支強心針!」

先斬後奏 阿媽力撐

提到片中的激情戲,她自爆當初並沒有向家人坦白「招供」:「當初好驚屋企人介意,怕佢哋唔開心,拍到一半有唔少報道出街提到全裸戲份。本身驚媽咪睇到會嬲,不過佢好體諒同明白我,仲叫我要專心啲做好佢,當時真係好感動!套戲上映後有唔同評價,當然有人覺得內容色情,我都有同媽咪傾過,但佢係讚套戲拍得好,叫我加油!」

欣賞珍妮花勇於求變

Koyi下定決心入行,她透露想成為演員的原因:「之前拍完套戲,有朋友睇完話角色好有義氣、有大家姐Feel,令佢諗起好多學生時代嘅往事,我好想以後嘅作品都Inspire(啟發)到人哋!」

問到心中的偶像是誰?她說:「我好鍾意Jennifer Lawrence(珍妮花羅倫絲),佢咁後生就做影后,真係好犀利!而且佢冇將自己局限喺一個框框入面,而係不斷嘗試,當中最值得欣賞係佢嘅率性,唔會為咗討好某啲人而改變自己。香港演員我就鍾意黃秋生,演技好又夠真性情,好希望有機會同佢做對手戲,跟佢學嘢!」

文:陳丹

攝:張福宏

場地:ibility

服裝:FlossyxFlossy

首飾:FABcessories