無綫藝人謝東閔參加歌唱比賽入行，誤打誤撞下被古明華鬧出演戲興趣。在TVB熬了逾五年，近日漸為人知的他，希望挑戰演繹陰沉角色，令經常取笑他「Seven」的金剛見識他的另一面！

謝東閔

謝東閔自言擇偶冇乜要求，最緊要鍾意！

謝東閔（Brian）是「巨聲幫」出身，他說：「大約17、18歲參加過新秀同好多其他歌唱比賽，冇諗過入咗TVB變咗演戲多。諗番起初拍劇都唔知自己做緊乜，講嘢口震，慢慢發覺愛上演戲，直至拍《流氓皇帝》遇到古明華，一開始佢都鬧我，因為我犯咗好多技術錯誤，例如行錯位，我嬲咗佢！後尾明白佢係想我好，就做咗好朋友，遇到唔明都會請教佢，佢好肯教我，我希望將來演啲陰沉角色，覺得自己Carry到！」

擇偶着重性格

提到獲《愛情食物鏈》拍檔金剛撮合他與高海寧（高Ling），Brian說：「高Ling嘅外形好多男仔都鍾意，佢梗係靚！（自己係靚仔擇偶重外表？）靚仔唔應該自己講，但我擇偶比較着重性格。（嬲金剛話你Seven？）可能我心直口快，我都話佢Seven！冇嬲，我哋好Friend！」

鍾意講爛Gag

Brian在劇中角色屬食物鏈的低層，但現實中條件不俗，他說：「依家冇拍拖，想拍但難搵，我比較慢熱，易令人誤會我寸，但其實好多嘢講，鍾意講爛Gag！（家境不俗應該易搵女友？）屋企唔算好富裕，只係普通中產，媽咪開外傭介紹所，阿爸開髮型屋，我好彩嘅係唔使擔心父母經濟，可以專心搵自己嘅興趣！」

文：影視組

攝：司徒國榮