蔡國威日使50蚊搵朋友請食飯

亞視臨時清盤人昨晚決定遣散所有亞視員工，今日正式停播。各亞視員工前途未明，啟動「10A」自動遣散近1個月的蔡國威，經濟情況已捉襟見肘：「盡量都自己煮，每日限住使50蚊！」朝早食烚蛋、麥皮的他，拖到下午茶時段才食午餐：「夜晚就搵人請，尋晚就林建明負責，今晚就圈外朋友請。」打算賣車的他亦指座駕未售出，惟有停止揸車慳油錢。

蔡國威指亞視解散員工是意料中事：「一間咁專業既公司，如果唔係有真憑實據知道冇錢，係唔會做出咁既決定！」又稱亞視落得如此下場實在不捨，但認為這決定是好事，讓員工清醒過來。問到會否回亞視見證結束的一刻？他說：「唔會返去亦唔會Mon住電視睇佢熄機，唔捨得，望住佢熄機個一刻會好痛！」

幫亞視拍兒童節目《我們這一家》的劉家蔥，被拖糧總計約17萬，靠外出登台、主持應付生活開支：「動用緊積蓄，好彩老婆有收入。」又指8歲的囡囡生性，都知亞視冇出糧：「之前每年去兩三次旅行，但佢冇開聲問我。」

亞姐筱靖唔憂米

有人水浸眼眉，亦有人唔憂柴米。亞姐出身的筱靖表示即使亞視欠她1個月人工，經濟亦不成問題，更請得起經理人幫接騷接Job。除搞咖啡全國代理外，她更投資開德國餐廳：「嚟緊都會做埋德國啤酒代理。」更稱與幾位新城DJ到慈善機構探訪又派米。

亞姐出身的張家瑩表示亞視仍欠她一個月薪金，但她有富貴爸爸塞過萬蚊零用錢給她：「以前都會拎亞視份糧去頂車位嘅錢，每月都要$4,900。」現在打算用登台工作的酬金補貼車位租金。又稱正有娛樂公司找她簽約。

葉家寶：痛心疾首！

前亞視執董葉家寶：「痛心疾首！」對於亞視欠他的官司費用、罰款及欠薪等，他稱正積極向勞工處追討。被拖數逾百萬的他表示生活不成問題：「會好小心用錢，出嚟食飯，一班朋友都會爭埋單！早前我冇做亞視後去旅行散心，都係喺朋友度住，慳番酒店錢，（搵工？）好朋友陳善之同陳家瑛好努力幫我推薦啱我嘅新工！」另前亞視製作副總裁趙汝強稱未有經濟問題：「我考慮開製作公司！」

亞視1982年演員訓練班學生的黃秋生，對於亞視解散所有員工並正式停播，他說：「遲早嘅事啦！（戥員工不值？點睇捱唔到4月1日？）冇得睇啦，冇水有乜得睇？快啲完咗佢啦！況且一雞死一雞鳴，好快有新電視台。」（唔捨得亞視？）冇，走嗰陣不知幾討厭！淨係好懷念好多人。」

曾效力亞視的梁思浩昨晚火速在微博發文：「一間超過五十幾年歷史的電視台……終於沒有了。原來一個X街老闆，最終把亞洲電視玩死了！很心酸！」前亞視製作人徐小明說：「心痛！我曾經同啲行內人講，等到亞視4月1號嗰日，我哋義務幫佢哋做個Say GoodBye騷，點知搞成咁，好過分！」

文：影視組