最近有傳71歲資深藝人盧大偉患上腸癌病危，昨晚盧太接受電話訪問時承認丈夫患病，但絕非腸癌：「梗係唔係啦！啲人語無倫次，佢只係年紀大，健康有啲麻煩，絕對唔係腸癌。（咩病？）唔想講，我唔係醫生，我仲消化緊（件事），多謝大家關心，佢陪住大家成長，希望大家咪詛咒佢，應該用祝福字眼。」有Fans上載盧大偉去年12月出席聚會的照片，當時其身形已激瘦。

而好友鄧英敏對此表示：「舊年年尾我喺一個商業聚會見到佢，當時有傾偈。（當時都咁瘦？）過去兩年都瘦，身體好弱，不過問嘅時候佢太太又唔多想講，我哋做朋友唔方便追問太多，只希望佢冇事。」鄧英敏希望大偉好好休養，下月22日能出席EYT聯歡聚會。而吳麗珠透露有探大偉，但不會說太多。廖安麗則表示過時過節有互傳訊息問候，但不知他是否有病。身在澳門的斑斑則表示前一排見到大偉不覺他有病，希望他沒事。