眾影星於奧斯卡金像獎台上血拼,紅地氈亦有一眾女星盛裝上陣抗敵,今年不少女星還原基本步,以Deep V戰衣大晒天賦「胸器」搶鏡!

火辣美人魚

一向愛型格打扮的女星查理絲花朗(Charlize Theron)前晚大方真空上陣,着上一襲Deep V鮮紅魚尾裙配以Sharp醒短髮,雖然未有Big爆效果,但性感加貴氣夠搶分,加上雙吊帶設計添玩味,整體造型好評如潮!

純白仙氣

美國女星奧莉花懷特(Olivia Wilde)揀選純白高級訂製服上陣,配上女神髮髻晒「仙氣」之外,中門大開的設計更見盡驕人身材,正面有「胸器」,轉身再放送玉背,而裙身線條利落,僅以打褶點綴,令性感造型未落俗套,清新又養眼,更與未婚夫Jason Sudeikis齊齊「晒背」!

輸影后贏性感

有份爭影后的茜爾莎羅倫(Saoirse Ronan)雖然失落獎項,不過一襲吊帶Deep V長裙令她成為紅地氈焦點,除了Deep V設計,大露背亦令其酥胸半露,雖然夠晒性感,但綠色裙身綴以珠片則略見老氣。

環保女神

《權力遊戲》(Game of Thrones)女星Sophie Turner穿上Galvan貼身晚裝上陣,心口小開低V含蓄性感,加上簡約線條,造型清新,據悉裙身用了環保物料製成,Sophie散發氣質之餘,原來仲係環保女神!

略嫌老氣

澳洲女星瑪歌羅比(Margot Robbie)以Tom Ford金色長袖晚裝上陣,以Deep V設計打出心口,雖然夠吸睛,但年僅25歲的她光閃閃,略嫌老土,幸佩戴Forevermark美鑽點綴,增添貴氣!

專屬型格

氣質女星朗妮瑪娜(Rooney Mara)偏愛Nude色系晚裝,今次穿Givenchy繡花魚尾裙再大晒獨特潮流觸覺搶分,雖然未如「Deep V黨」一樣「胸猛」,但亦有透視設計低調性感,加上Cut-out設計為長袖晚裝添玩味,型格搶鏡!

半熟青春

身材Fit爆的珍妮花羅倫絲(Jennifer Lawrence)能駕馭多款性感晚裝,今次以代言品牌的透視喱士長裙示人,稍露心口,成功將成熟設計演繹出青春氣息,配上蕭邦(Chopard)珠寶點綴,高貴又大方。

文:外娛組

圖:美聯社、法新社