肥媽昨日為本月舉行的紅館騷排舞，與好友黑妹大講有味笑話，又調戲男排舞師！她透露兒孫及親友都會回港欣賞演出，但家人拒絕攞免費飛，堅持親自上網購票以示支持！

黑妹（左起）、肥媽及方伊琪排練紅館騷，舞步學極仲有，真係「舞」時停！

原先排舞時大家都好正經，點知肥媽突然講有味笑話，嚇到排舞師秒速彈開！

殿堂級歌手肥媽（Maria Cordero）、黑妹（李麗霞）及方伊琪，昨日為本月18至19日假紅館舉行的《肥媽友誼長存30周年演唱會》排舞時，笑料百出！排舞師原先表示會教她們做3套動作，期間卻愈教愈多，肥媽問：「係咪真係冇喇？」排舞師說：「仲有少少！」肥媽即大開黃腔：「咁畀你嗰『小小』嚟睇吓！」黑妹在旁和應，更大唱《我是一隻小小小小鳥》，令全場爆笑！

紅館騷加映家庭聚會

受訪時，最後一次開紅館個唱的肥媽透露已邀請子女及孫兒回港睇騷，屆時似足舉行家庭派對：「佢哋要我畀佢哋學一隻歌，到時o係台下起身一齊唱！」她自爆原先打算為家人送上演唱會門票，卻遭拒絕：「阿妹、妹夫同女婿都話唔准我畀飛，話要自己網上買！阿妹仲話我照顧咗佢哋好多，要畀機會佢買番張飛嚟支持我，呢句說話係咪令人想喊先？」

69歲老公氣促嚇餐飽

她又提到曾有人問她為何不參加《我是歌手》，她坦言想為家人預留時間：「冇諗過，因為唔需要，同埋我想陪屋企人。老公已經69歲，平時唔睇醫生，上年竟然走去睇中醫，原來佢覺得抖氣辛苦，嚇死我，好彩唔使通波仔！」她自爆與黑妹忙於工作，身體於去年齊齊發出健康警號：「我哋唔係為錢，係太有義氣！有人叫我哋幫手，我哋就出錢出力，永遠唔講No，淨係同屋企人講No，呢樣嘢係最差。」

文：音樂組

攝：劉智源