歐陽震華（Bobby）昨日為《一屋老友記》拍攝外景，雖然Bobby曾因急性肺炎入院，但依然身手了得，更自爆日前瞓醒食完話梅後，隨手打了一個側手翻，令全場震驚。

Bobby透露其戲份快將煞科，終於有機會休息！

Bobby在遊戲機中心捱打，更拒用替身。

胡楓嫌遊戲機太大聲，惟有用棉花塞耳。

無綫新劇《一屋老友記》演員歐陽震華與胡楓昨日到九龍灣一間遊戲機中心拍攝外景，劇情講述Bobby為劇中被胡楓上身的張彥博出頭，結果被打。曾因急性肺炎入院的他自爆開工拍劇不會錫身：「喺控制範圍做到嘅都自己做，有晚拍劇未輪到我就瞓一陣，後來有人畀粒話梅我食，之後我做咗個側手翻，現場大吃一驚，其實側手翻啫！又唔係空翻，有幾難？但啲同事之後就話凡見Bobby攰，畀粒話梅佢食就得，話話梅令人興奮！」他又表示其戲份快將煞科：「仲有幾日拍晒，都拍咗幾個月，第一主景屋企，拍咗60幾日；第二主景小食店，十場戲八場有我，唔係體力上嘅辛苦，係心攰，個腦實晒，你知喜劇係要現場度嘅，所以煞科後都要抖抖。」

胡楓蒲機舖頭暈

另外，胡楓因遊戲機聲浪太大要用棉花塞耳，他說：「喺呢度工作嘅人，究竟係點樣忍受到？我喺度逗留一個鐘已經頭暈唔舒服，我咁大個仔都未去過遊戲機中心，冇興趣，亦都怕上癮，今日嚟呢度都叫做見識吓，但就興趣不大！」劇中胡楓會上張彥博身，他倆以同一打扮亮相，張彥博說：「我會學胡楓嘅動靜，例如托眼鏡咁。」

文：影視組