鍾嘉欣昨日在溫哥華擺酒，與她齊組姊妹團契「Amazing Esther」的四位好姊妹岑麗香、李亞男、苟芸慧和王君馨，組成「冠軍姊妹團」陪嘉欣出嫁，更落力在婚禮上打點一切，除不時為盛傳大肚的嘉欣護肚外，又大玩摸肚沾好運。而喜奪花球的君馨更將花球轉贈苟芸慧，希望好姊妹快快找到Mr. Right！

鍾嘉欣結婚，冠軍姊妹團王君馨（左起）、李亞男、岑麗香和苟芸慧齊齊陪嫁。

拿着花球的李亞男（左），拖着王君馨離開寓所去飲宴。

姊妹團齊齊出動跑出屋，場面搞笑。

鍾嘉欣昨日在溫哥華補擺婚宴，與四位好姊妹岑麗香（香香）、李亞男、苟芸慧和王君馨（Grace）組成姊妹團契「Amazing Esther」，五位靚女更幾乎清一色是選美冠軍，最早嫁作人妻的李亞男是2004年《溫哥華華裔小姐》冠軍及2005年《國際華裔小姐》冠軍，香香則是2009年的《溫哥華華裔小姐》冠軍及2010年《國際中華小姐》冠軍，緋聞多多的苟芸慧於2009年勇奪《國際中華小姐》冠軍，至於Grace雖在2007年的《全美華埠小姐》及港姐飲恨僅奪亞軍，不過甚有舞蹈細胞的她於2008年在內地舞蹈節目《舞動奇跡》一嘗冠軍滋味，四人更共組「冠軍姊妹團」，陪伴好姊妹出嫁！

婚禮搞笑感人

「有喜」的嘉欣將會是「Amazing Esther」中第一個跑出做媽媽，而「冠軍姊妹團」在婚宴上為嘉欣打點一切，其中苟芸慧更親自向傳媒派水及麵包。她們除全程為嘉欣護肚，更孖住大玩摸肚，齊齊在嘉欣身上沾好運！而嘉欣亦相當疼錫一班好姊妹，就連花球都被Grace接到，未知Grace是否見苟芸慧感情未有着落，即大方轉贈花球，苟芸慧在網上留言感謝Grace：「辛苦了寶貝！我突然變得好搶手！」至於李亞男則留言：「恭喜Grace！明年等你嫁！」莫非想暗示Grace下年有「喜事」發生?

接得花球的Grace受訪時大爆嘉欣讀誓詞時爆喊：「佢有少少眼濕濕，我哋啲姊妹就嚟料，但係開心眼淚。」李亞男則笑言婚禮既感人又搞笑：「覺得佢終於可以遇到一個啱佢嘅男仔，同可以照顧佢嘅老公，見到佢爸爸拖佢入嚟，呢啲場面實會喊，係開心嘅眼淚。同埋見到佢爸媽，我都會諗起我嘅父母，我見到佢哋耐唔耐眼濕濕，都感覺到佢哋為囡囡好開心，見到個女有自己嘅家庭，就會好似我自己爸媽咁，會有唔捨得，同埋要Let Go咯。」

讀誓詞眼濕濕

至於香香則說：「見到嘉欣眼濕濕，我哋成班女仔都眼濕濕埋一份，真係戥佢好開心，見到佢同老公好夾、好可愛、好Sweet呀！佢哋同家人斟茶時特別感動添！」

採：影視組、溫哥華特約記者

文：專案組