歌手張惠雅（Regen）及鄧小巧昨日各自到電台宣傳新歌，兩人不約而同提到人生低潮，其中Regen自爆出走澳洲前是情緒最低落的時期，更試過用刀鎅大髀！至於早前冇Job接的小巧為免家人擔心，常常要出街扮做嘢，以瞞着他們！

Regen自爆因愛情事業雙失，用刀鎅大髀。

Regen表示澳洲之旅令她改變甚大，走出人生低潮。

小巧坦言有一段時間冇工開，常常出街遊蕩扮有嘢做。

Regen表示想藉新歌《自己的情歌》感謝身邊朋友在她失落時扶她一把，問到失落是因為愛情還是工作？她坦言全部都有，最失落是去澳洲前的一段時間：「嗰陣嘅人生觀、價值觀都畀呢行工作摧毀咗自己。（當時情緒有冇問題？）嗰陣想睇醫生，但Book咗都唔敢去，會驚，最差仲試過傷害自己，最激動係用刀鎅大髀，冇諗過係咁大鑊，但好彩把刀平時切生果，唔知點解鎅極都鎅唔到，後尾身邊有人即刻叫停我，所以嗰次係最深刻，自從嗰次都停止傷害自己。」

工作過於執着

她承認以前對工作過於執着：「例如拍劇講錯一句對白，我會返去諗成晚瞓唔着，但去完澳洲之後，學識就算做得唔好，當下已係冇得補救，惟有下次做好啲，依家學識抽身，所以澳洲之旅令我改變好大。」

至於小巧最近推出新歌《雅俗》，講到等待六年終於將在今年出碟，她透露臨完無綫合約前一、兩年，曾有一段時間沒有工作，為免家人擔心，只好常常出街扮有嘢做：「其實係出街遊蕩，咁樣都維持咗一年，慶幸已經過咗。嗰陣雖然有教唱歌同普通話，但收入唔穩定，同埋瞓唔到覺，成日失眠。（家人唔知呢段經歷？）唔知。（當時情緒有冇問題？）未去到要食藥，因為我都樂觀，唔開心會同朋友講，情緒搵到出口就得。」