周麗淇昨日出席慈善活動時被問到做慈善探訪最難忘的經歷,她說:「最難忘有一次差啲連命都冇,嗰次去咗印度探訪,幫當地嘅小朋友籌款,因為係海拔高嘅地方,我有高山反應。我到埗當日沖咗涼,原來唔可以喺第一日沖涼,我唔知道,冇人提我。沖涼會令血氣運行,沖完後我好暈,要打針食藥,驚自己會唔會死,嚟幫人點知要人幫番,啲醫生要照顧我,嗰刻我嘴唇發紫,啲氣壓令到我個人脹晒,勁驚,未試過咁樣,死咗半咁。(夠唔夠膽再去?)嗰個地方可能差啲,有啲危險,要衡量吓自己能力,可能要揀地方去,唔適合去啲海拔高嘅地方。(探訪有冇試過喊?)不嬲唔會喺佢哋面前喊,背後就會。」她又透露今年會以私人性質在港探訪智障人士。

周麗淇表示最難忘到印度探訪時患上高山症,令她猶有餘悸。