無綫小生王浩信昨日拍攝新劇《致命復活》飛車戲，怎料假戲真做撞上重型車輛，隨即手現血漬、左眼皮(界刂)開，撞到頭都腫，幸送院後仍清醒地說：「希望冇破相。」

工作人員將王浩信扶離車廂。

王浩信在床上擺出OK手勢，着大家不用擔心。

王浩信的座駕車頭撞到變晒形，睇見都牙煙！

郭晉安當時不在車上，但見王浩信出事，即上前慰問。

王浩信與郭晉安昨日於屯門拍攝飛車場面，講述王浩信在車上打鬥，事前他稱做足安全措施，怎料拍攝時「假戲真做」撞上重型車輛！撞車後，手染血漬的王浩信表情痛苦，由工作人員扶離車廂，並坐在一旁飲水抖氣定神，安仔亦神色凝重地慰問。

眼皮遭割開

救護車到場後，王浩信於救護員攙扶下自行上車並說：「頭有啲暈。」送往屯門醫院的他臥床休息，左額及眼皮貼紗布，右手食指亦包紮住，但仍清醒地向記者說：「頭仲有啲痛，稍後照掃描睇吓有冇撞親腦，相信冇大礙，左眼皮輕微(界刂)開，都唔知個頭撞到邊度，搞到腫得咁嚴重，希望冇破相。」他擔心影響拍攝，更怕家人擔心，已向太太陳自瑤和母親報平安：「我頂得住，希望快啲康復，現實同拍劇都未試過撞車。」監製林志華現身醫院了解，他表示已取消所有場口，該劇下月初移師越南取景，但一切以王浩信健康為優先考慮：「等做晒檢查先，佢好有責任感，同我講唔想阻拍攝進度，公司都以佢健康為主。」

據知，電腦掃描結果顯示，王浩信未有出血或骨裂，待額頭消腫及再觀察，需休息數天。

文：影視組