視后胡定欣近日被指與林夏薇杯葛同劇的王君馨，昨日三人為劇集宣傳，定欣與夏薇全程孖住傾，冷落了一旁的君馨，及後要求三人合照，起初定欣甚為抗拒，擾攘一輪才尷尬「行埋」。

胡定欣（左起）、林夏薇與王君馨合照，笑容有啲生硬噃！

林夏薇與王君馨在台邊擾攘一輪，最終才上台。

蕭正楠（左）笑阿廉扮「玉莖重生」，係老友先敢玩咋！

胡定欣、林夏薇、蕭正楠（Edwin）及曹永廉等昨日為劇集《公公出宮》宣傳，焦點集中於盛傳不和的定欣、薇薇及王君馨身上，現場所見，定欣與薇薇如連體嬰般黐到實，又不時咬耳仔，細聲講大聲笑，顯然與站在另一邊的君馨沒甚交流，及後記者要求三人合照粉碎不和，惟定欣起初不太願意地說：「咦！唔好啦！」擾攘一輪過後，定欣見薇薇與君馨已準備就緒，才勉為其難上前合照，場面尷尬。

斥杯葛之說亂講

對於被指杯葛君馨，薇薇否認：「亂講！識我嘅人都知我咩性格，多謝幫我哋宣傳，拍呢套劇好開心，最深刻係中三次暑。（君馨話私下冇同你食飯！）私下都會成班人食飯，有時間都陪老公同家人，因為大家都好忙。（君馨同你下跪講Sorry？）點會有呢啲事！」而視帝黃秋生將客串黎耀祥的處境劇，問到定欣可會自薦演出？她說：「到時我應該喺隔籬廠開緊第二套劇，不過知佢套劇係講電視台，祥仔係監製，到時會有唔同演員客串，話唔定我都可以演出，只係未必係秋生嗰兩集。」

阿廉扮「莖」玩到謝

至於Edwin在活動上玩謝好兄弟阿廉，呼籲觀眾上台打其Pat Pat，又要求阿廉模仿「玉莖重生」表情，事後更抵死說：「阿廉扮『莖』，佢成個樣都係咁啦！」對於劇集收視報捷，他表示會待黎耀祥登台返港再約飯局：「阿廉話去佢間舖頭食，趁執之前請大家食飯，希望我哋食完之後會令佢生意興隆！（幫襯過？）有，佢好慘，做乜生意都咁，希望可以低處反彈啦！（唔驚阿廉嬲？）我最愛係曹永廉，佢為人善良，年紀差唔多60歲，但心智仲係小朋友，佢外父John哥（姜大偉）都係大佢少少，好似同年添！（佢樂於畀你哋蝦？）都係，但John哥唔喺度就會發難，好彩佢今日喺度！」

文：影視組