前晚是麥當娜駕臨澳門新濠影滙綜藝館的巡場頭場，每晚她都會抽粉絲上台，而前晚的幸運兒竟是香港天王陳奕迅（Eason）！兩大舞台王者在台上鬥舞兼過「蕉」，期間Eason不但被麥當娜大踢屁股，High爆的他跳Breakdance時更不慎失足跌倒，頓變滾地葫蘆，令麥當娜笑不停！

國際樂壇天后麥當娜（Madonna）完成香港巡唱後，前晚駕臨澳門新濠影滙綜藝館，舉行《Rebel Heart Tour世界巡迴演唱會》頭場，吸引半百星級粉絲捧場，包括劉嘉玲、郭富城及陳奕迅及蔡卓妍等人，當晚麥當娜繼續在台上施展渾身解數，但講到全晚的高潮位，一定非麥當娜拉了台下喪跳的Eason上台莫屬，兩人在台上鬥舞兼過「蕉」，麥當娜更踢Eason屁股及公然向他「老笠」六百二，國際天后點中香港天王，當然令全場High爆！

聽唔清講Sorry

每場演唱會臨近尾聲唱到《Unapologetic BXXch》時，麥當娜都會邀請粉絲上台共舞，而前晚麥當娜就揀中在台下喪跳的Eason上台，現場觀眾即刻瘋狂尖叫！一上到台Eason即刻勁Hyper跳舞，期間被舞蹈員夾住，讓麥當娜用手和腳打其屁股，但因女兒在場，眾人舉中指擺甫士時轉舉無名指。之後Eason捉住一邊腳凌空跳想表演花式，卻失足雙膝落地，變成滾地葫蘆，麥當娜即時笑到瞓低！Eason再「蜈蚣彈」起身。

麥當娜和Eason作爆笑肢體交流後，國際天后再展開與「臣」對話，同樣精彩絕倫，麥當娜問Eason：「叫甚麼名字？」Eason聽不清就講：「Sorry」，麥當娜即笑說：「你叫Sorry？」接着Eason自我介紹：「我個名叫Eason。Season少咗個S。」麥當娜跟住全場尖叫！其後麥當娜更搶去Eason副眼鏡來戴：「你依家靚仔好多！」Eason大笑。

老笠六百二

然後麥當娜忍不住問Eason：「飲了幾多酒？」Eason就說：「冇飲酒，我是Natural High（自然興奮）！」接着他又說：「可以為你做任何事。」麥當娜即公然在台上「老笠」Eason：「你個袋有幾多錢？」Eason從口袋掏錢，麥當娜逐張錢搶過來，但嫌錢不夠，最後Eason共掏了620元出來，麥當娜統統把錢攝入胸部，更一度伸手到Eason後面的褲袋摷錢，非常搞笑！期間麥當娜差點忘了頒「蕉」給Eason，當時Eason顧住跟身旁舞蹈員傾偈，麥當娜即喝停他：「咪講嘢住，呢個係好特別嘅時刻，好似頒獎禮咁，只不過你唔係攞奧斯卡，係攞條蕉。」之後將蕉遞給Eason，並大講有味笑話叫他：「扔蕉。」Eason尷尬地說：「我個女兒喺台下。」轉數快的麥當娜即笑說：「你用屋企部Xbox同隻蕉玩啦！」最後麥當娜多謝Eason共舞，並請他下台，Eason送飛吻，麥當娜最後都不忘笑言Eason攞唔番啲錢。

最難忘一夜

完場後，Eason拎住麥當娜送的蕉離場，見跳到成頭汗的他興奮地形容似去了另一空間，他邊吔蕉邊跟大家開心Share：「幾緊張，麥當娜喎！（點解上台？）當麥當娜話覺得台下嘅觀眾好似靜咗啲，唔夠High，我即刻諗起自己嘅演唱會，啲歌迷都成日係咁，感同身受。我之前一直好投入係咁跳，我知娜姐見到我，所以工作人員就請咗我上去，我亦二話不說上台。」事後Eason在社交網上載多條與麥當娜共舞片段，留言表示超級開心、非常刺激，還稱自己是「Naughty Boy」（頑童），又指是人生中最難忘一夜，徐濠縈也轉載老公被打Pat Pat段片，寫上「Battle」加笑到喊符號。據知Eason跟徐濠縈帶囡囡康堤過澳門睇麥當娜，因為麥當娜在港開騷是星期三、四，康堤要返學，因為不想影響女兒，所以特別再揀星期六去睇騷。

文：音樂組