老婆放生安仔攞正牌親熱
「視帝」郭晉安前晚為新劇拍攝被朱晨麗偷吻的場面,他坦言今次乃從影以來最多親熱戲,幸獲太太歐倩怡「放生」。文:影視組
安仔與朱朱開工前擺心形甫士熱身。
朱朱在劇中趁安仔瞓着偷吻。
安仔笑言拍親熱戲緊張,朱朱則表示零壓力。
郭晉安(安仔)與朱晨麗(朱朱)前晚為新劇《致命復活》開工,拍攝一場朱朱趁安仔熟睡時偷吻的戲份,穿上皮裙晒腿的朱朱一副戰鬥格,未埋位時更與安仔大擺心形甫士。
笑言感緊張
談到拍攝該場戲可有準備?朱朱笑說:「我漱定口、撩完牙、用埋牙線添!」安仔搞笑地表示很緊張:「佢趁我瞓着偷吻我,我就趁佢偷吻我前瞓着!(有互咀戲?)唔知導演要求,幾緊張,好耐冇拍。(拍親密戲尷尬?)拍咗長時間會好啲,好似我同陳庭欣有場一夜情戲份,由第一次見面話拍,拖到熟悉咗都未拍。」而非首次拍親熱戲的朱朱則笑言零壓力!
身為人夫的安仔,被問到拍攝前可有向太太歐倩怡備案?他說:「佢叫我唔使講,叫我出去見識吓,佢明白係做嘢。(劇中畀女圍?)入行以嚟最多親熱戲,過兩日可能又拍床戲。(太太睇到眼火爆?)電視尺度唔係拍電影。」
遭囝囝質問
此外,安仔自爆曾與囝囝在西貢撞見劇中曾演其太太的萬綺雯,沒料對方開口嗌他「老公」,結果被囝囝質問:「佢問我點解姐姐叫我老公,我咪同佢解釋番演員會投入角色,最後佢都明白。」