蕭正楠（Edwin）及女友黃翠如昨日趁情人節出席活動公然晒恩愛，在醒獅襯托下感覺如拜堂，Edwin唱了兩首情歌冧暈女友，翠如則表示日前到男友家拜年，打麻雀鬆章氹蕭母，認真識做！文：影視組

拿着猴子公仔的Edwin及翠如情侶檔出騷，恩愛放閃。

「情侶醒獅」在台上錫錫時，司儀叫Edwin及翠如有樣學樣，兩人用猴子公仔「代咀」。

Super Girls希望今年可以「破Dry」。

蕭正楠及黃翠如昨日與女子組合Super Girls（SG）到油塘出席情人節活動，Edwin獻唱兩首歌曲，令翠如冧爆大嗌：「好聽呀！」合照期間，一對「情侶醒獅」在Edwin及翠如面前錫錫，司儀梁嘉琪慫恿兩人有樣學樣，兩人搞笑地將手上的猴子公仔面貼面，Edwin還大方攬實女友合照，儼如拜堂成親！其後兩人手執花束合照，被笑似影結婚相！

鬆章冧未來奶奶

二人均表示不太重視禮物，翠如更講明不喜歡收花，寧願收盆栽，卻被Edwin踢爆經常種死植物！問到情侶檔出騷酬勞會否倍增？Edwin說：「唔知實際數字，我覺得意義比幾多錢重要！」翠如即說：「咁你今日嘅酬勞畀晒我！」Edwin尷尬笑住答好。

兩人透露新春期間已互向對方的家長拜年，翠如跟蕭母打麻雀時更識做鬆章：「我落場打咗一鋪啫！我又唔係好識，結果輸咗十幾蚊。」並透露沒有被長輩催婚。問到今年犯太歲的Edwin會否結婚沖喜？他說：「唔得，點可以搵婚姻沖喜，況且我唔係太理呢啲嘢，媽咪又會幫我攝太歲。（叫翠如幫手？）佢唔識！一陣愈攝愈衰。」

Aka收神秘玫瑰

同場的SG踢爆隊長Aka收到神秘人送的11支玫瑰，自認單身的四人希望今年「破Dry」，更羨慕Edwin及翠如恩愛放閃。