這個新年不太冷,因為一眾女星齊齊玩水上活動度歲,熱力四射!「視后」佘詩曼激罕穿上三點式享受陽光與海灘,大晒索爆背影;張栢芝則與兩個寶貝仔Lucas和Quintus在新加坡反轉水上樂園!

踏入猴年,一眾女星不約而同飛往外地度歲玩水晒身材,40歲的「視后」佘詩曼面對陽光與海灘即時來個大解放,前日罕有地在社交網大晒三點式照片,雖然只得背影,但見她開心到在水中彈起,身上無半點肥肉,網友紛紛大讚又索又靚,是神級「影後」!

張栢芝樂園引集郵

至於身在新加坡的張栢芝與兩名囝囝Lucas和Quintus亦被網友野生捕獲到水上樂園玩水,見栢芝一手抱着Quintus,身為哥哥的Lucas亦一邊護着細佬,一邊拉住栢芝,場面溫馨!雖然已為兩子之母,但栢芝身材依然Fit爆,引來不少粉絲爭相集郵,而她亦有求必應!

莊思敏護髮唔游水

而今年返家鄉馬來西亞過年的名模莊思敏(Jacquelin)亦與妹妹莊思華(Mona)和姪女去游水,但以Full Gear上陣的Jacquelin卻冇得游水:「因為我換晒泳衣落水之後,先醒起我個頭唔游得水,一游水啲頭髮就會甩色甩得好緊要,為咗Keep髮色,惟有同姪女喺淺水地方玩一陣水就當游咗!」

文:專案組