宣萱昨日出席慈善活動，提到與「舊情人」陶大宇於新劇《隱世者們》的親熱戲備受關注，她透露這場床戲仍未拍攝，但先要減肥：「過年後肥咗，尋晚開始戒飯，暫時未知劇本寫成點，都要收收身。（大宇都為劇收身？）唔知呀！顧掂自己先。」對於拍檔宣萱減肥「迎戰」，大宇笑說：「女藝人個個都貪靚，其實佢由開工至今都Fit咗好多，呢場床戲點拍未知，但電視尺度有限，可能佢想畀我攬得舒服啲，咪當係一股推動力去減肥囉！（你又點準備？）都瘦咗好多，但沖涼照鏡又覺得男人過瘦冇台型咁，都要食番少少嘢！（床戲受關注？）又冇咩壓力，對呢類戲都好有經驗，好多謝宣萱喺一啲訪問表示對我信任。」

陶大宇與宣萱合作無間，兩人對床戲做足準備。