43歲的孫耀威與女友陳美詩拍拖6年，他揚言會開行Turbo加把勁，有意今年迎娶女友過門，很喜歡小朋友的他更計劃在內地領養小孩，得到女友贊成及支持，實行造人與領養大計雙管齊下。

孫耀威不止領養貓仔，仲想領養埋「人仔」。

善解人意的Macy支持領養，更不介意男友於情人節「冇表示」。（設計對白）

久未露面的孫耀威（老孫）昨日以大使身份出席慈善活動，與陳美詩（Macy）拍拖六年，兩人不時被催婚，老孫終露口風有意做猴年新郎：「依家年頭啫，仲有好多個月，好多嘢會發生。」他相信Macy會嫁硬他，故大安旨意不用求婚：「Send個Email、WhatsApp就得！」又坦言結婚為生仔，與Macy同樣喜愛小朋友的他今年會加把勁，更有意在內地領養小朋友：「女友都想生，但我有留意中國人助養兒童計劃，有好多小朋友好慘，將來都考慮領養，Macy都好贊成。」

「生兩個、領養一個」

記者事後再致電老孫談及領養一事，他說：「以前一直想生3個，但依家諗唔使生晒，有錢有能力生兩個、領養一個。」他透露因隨好友鄺文珣到內地探訪孤兒院而改變思想：「領養好偉大，係好大嘅責任，好似我屋企啲貓仔咁，本身領養1隻，依家有3隻，覺得領養唔係天方夜譚嘅事。（想領養男定女？）冇所謂。」他甚至不介意領養病童，透露曾於探訪山區時看過一個腦癱小孩，當時有衝動在市區租地方給他住，並請看護照料：「都諗過可唔可以養佢，領養唔係揀手袋、揀衫，我會等天安排。」作為家中長子的老孫承認家人傳統，未必喜歡他領養。

女友Macy力撐

至於Macy則透過短訊回覆：「近來認識了一些慈善機構，幫助很多有需要的小朋友，所以老孫覺得很有意義，我們很支持領養，希望有更多孤兒可以有一個家，也希望喚醒更多人去關顧孤兒和有需要的小朋友。」而今日情人節，老孫竟約了大班朋友食飯：「自己好衰，Macy喺22號生日，諗住送佢222支玫瑰，做老土嘢，所以唔記得情人節。（推朋友？）佢好好，話我已經約晒，好諒解我！」

文：音樂組　

攝：劉智源