四洲太子女戴凱欣（Kennis）與上海金融才俊樊林爽（Justin）發展異地戀，拍拖9個月，今年首次共度情人節。Kennis特別為男友於Blue Brick Bistro西餐廳安排浪漫燭光晚餐。

戴凱欣與男友感情穩定，已視對方為終身伴侶。

Justin被問到與身家數十億的太子女拍拖會否有壓力？他說：「都冇咩壓力，我做番自己，靠自己，好有自信養得起老婆，我係上海人，上海人係好錫老婆。」Kennis亦補充說：「上海人係出咗名錫老婆，我喺上海見佢啲男性朋友對太太都好好，咁都有加分。」

問到異地戀會否難維繫？她說：「如果十年前可能會好多顧慮，依家緣分要嚟亦冇得諗咁多，其實我哋見面機會好多，大家有個心去爭取時間見面，感情仲好啲。」他倆已見雙方家長，亦成功通過長輩這一關，問到是否有結婚打算？Kennis說：「有初步計劃，但應該唔會今年，婚後住邊都要諗。（認定對方？）佢係我真命天子，同佢拍拖幾個月，覺得佢絕對係好老公，好有衝動同佢結婚，冇咩理由唔嫁佢。」Justin冧爆說：「我都認定佢係結婚對象，佢係我嘅女神，不嬲都好靚。」