組合Super Girls（SG）表示猴年願望是搵個「白馬王子」，並捉埋師妹陳詩欣到「東華慈善嘉年華」玩「陀飛輪」，借360度高速旋轉踢走衰氣！

SG約埋師妹陳詩欣玩「陀飛輪」，希望轉出桃花運。

Heidi（左起）、Aka及Jessica玩「極速空降」唔識驚，竟然想Encore！

SG玩旋轉木馬賀新年。

組合Super Girls去年底舉行的處女演唱會叫好又叫座，更憑健康形象獲廣告商垂青，羊年可謂大豐收！踏入猴年，SG與師妹陳詩欣到「東華慈善嘉年華」玩「陀飛輪」，希望「轉」個好運，膽量超強的隊長Aka、Jessica及Heidi大玩有27層樓高的「極速空降」，三女大叫過癮兼Encore。問到猴年想開騷定搵白馬王子？她們即齊心高呼：「搵白馬王子！」

Heidi有桃花

Heidi認有追求者，她說：「我哋係有桃花，不過係爛桃花，希望今年有個好桃花。」抵死的Yanny說：「我覺得公司個風水陣擺錯咗，可能要改一改。」SG有意舉行演唱會Part 2，Jessica希望屆時各姊妹都有另一半到場支持，Heidi即問：「演唱會嘉賓就係拖住男朋友出嚟？」

錄音感空虛

另外，隊長Aka透露近日的派台歌《無中生有》講述少女心事：「講啲女仔成日幻想同男友去邊度慶祝，因為我哋五個暫時未搵到伴侶，所以錄音時有少少空虛。」而去年的樂壇新人陳詩欣則透露，今年暑假將推出處女EP：「希望有好成績。」

文：音樂組

攝：黎志輝