歐陽震華年初一屋企樓下火燭，他「烈火雄心」勇敢為鄰居撲火，沒料到昨日要為無綫新劇拍攝救火戲，認真人生如戲！

大年初一化身救火英雄的Bobby，昨日拍攝救火戲時笑言「細火」！

Bobby與老友萬綺雯互派利是。

歐陽震華（Bobby）昨日為無綫新劇《一屋老友記》開工，拍攝一場在廚房的救火戲，期間他自爆年初一時在屋企樓下為鄰居撲火，認真人生如戲：「年初一同老婆出街拜年，落到樓見個看更同菲傭指手畫腳，梗係去八吓，個看更好平靜咁話出面花園火燭，出去睇啲火燒到十呎八呎高，於是叫看更攞滅火筒，看更慢慢去攞咗個滅火筒嚟，然後問我點開，同佢打開咗我膽粗粗行先，點知畀佢噴到我成身粉，後來索性搶個滅火筒自己去救火，最後救熄咗個火啦！」

救火英雄成身粉

Bobby變身救火英雄後，因成身粉而再回家沖涼換衫：「返到屋企工人問我咩事，我話出面落雪呀！不過不幸中之大幸，再沖多次涼好小事，但個火頭好近座樓，以我所知啲鄰居出晒埠，周圍都冇人，好彩畀我撞到，但真係估唔到有人唔識用滅火筒，其實我都係第一次用。」至於昨日的火燭戲講述Bobby衝入廚房發現起火，他拍攝時入木三分，面對熊熊烈火時笑說：「啲火仲細過我屋企嗰日喎！」

萬綺雯唔記得帶利是

另外，Bobby在化妝期間巧遇為另一新劇《致命復活》開工的萬綺雯，兩人互派利是祝賀，他看到利是封笑說：「十三蚊呀！」萬綺雯則說：「十三萬呀！」剛病愈的她表示年廿九再大感冒：「年初三同老公去拜年，食咗藥懵懵哋，又唔記得帶利是，可能我潛意識仲想收利是。」

文：影視組