王君馨情迷「洗碗公」等收鑽戒

王君馨首度挑戰棍打「竹升麵」，寓意新年步步高陞！她由落材料搓麵粉到坐棍壓麵團，全程有板有眼，問到平日可會下廚？她自爆要先搵「洗碗公」結婚：「唔鍾意煮係因為太唔鍾意洗碗，應該有一日結婚個老公會洗碗，咁我就好恨煮嘢！」她與長居外國的男友蜜運十年，大爆被對方的住家男特質俘虜：「佢幫我洗碗執屋，我就會愛上佢！佢喺廚房洗碗或者煎牛扒，畀我喺後面攬住佢就覺得好浪漫！」談到結婚打算，她笑說：「佢近期有問過我鍾意咩戒指，我淨係話唔鍾意圓形鑽石咁悶，佢自己諗喇！（幾歲前結婚？）期待我哋會喺同一個城市先，身邊朋友都生小朋友。（35歲前生？）都係！」她又自爆想與朋友搞生意：「如果結埋婚生仔先去生意失敗，我輸唔起！」