陳婉衡憑36E驕人上圍彈出，成為新一代「宅男殺手」！她上位後密密接Job，騷價幾級跳，揚言猴年要做業主！她說：「新年願望當然係想盡快做業主，雖然上年多咗Job，又接廣告，算賺多咗，但同時買咗好多嘢裝備自己，應付唔同類型工作，而且都要畀家用，所以要再努力啲，希望猴年愈賺愈多！」問到有否買嘢獎勵自己？她說：「冇實際買啲咩，反而去多咗旅行，畀自己放鬆嘅機會。」她去年更連接兩部電影挑戰自己：「第一次拍戲覺得幾好玩，但一開頭睇劇本時，都驚做唔到導演想要嘅效果，好在有前輩許紹雄帶住我，等埋位時睇咗好多前輩真人示範。而之後嗰套就比較嘻嘻哈哈，成日都成班女仔一齊，好似平時咁，好自然。」

陳婉衡雄心壯志，希望新一年賺到上樓！

陳婉衡初嘗演員滋味，原來要捱冷淋凍水，認真唔易做！

陳婉衡又大爆初嘗當演員背後的辛酸：「開戲嗰陣係幾辛苦，最難忘係有場戲講我哋做Promotion Girl，着住小背心短裙喺銅鑼灣街頭畀人用水淋，仲要係冬天得13、14度，啲水仲要係凍！咪睇Roll機嗰陣我哋班女仔好似好開心，其實一Cut，所有工作人員就拎薑茶、大褸畀我哋！」