昨日股巿波動，大跌逾七百點，一眾藝人有人歡喜有人愁，萬中無一的前中國小姐趙哲妤微賺五位數，十分犀利！

趙哲妤表示沒受跌巿影響，更微賺五位數。

少爺占

趙哲妤：「係呀！因為環球股巿都跌，拖累咗，不過我都係賺。（即係手頭上都冇跌？）上次跌到好低位嗰陣入咗巿，港交所同另一隻細價股用嚟溝咗貨。（有冇再入？）冇！唔夠低，不過依家新正頭，想第一日就賺錢，年頭行運行到年尾嘛！所以我放咗少少，微賺五位數，其實本來都唔應該放，最少恒指19,500點以上升巿嗰日先放得，不過依家總算攞個意頭，猴年第一日執番啲就滿意。」

DJ少爺占：「手頭上冇乜（貨），因為之前要置業，變晒現金，依家股巿咁波動，但未有時間入，所以冇乜影響，不過我想講啲人好得意，跌就好驚，唔明點解升時候就想買，呢個諗法就係錯，應該跌嘅時諗係咪係時候要入，到升嘅時候就要放，如果做得到就係大贏家。」

朱晨麗：「總共買咗六位數字嘅股票，其中有能源股，其實我買嗰時都好低嘅，跌到依家都未入肉，同埋之前升都放咗好多。不過梗係希望咪冧啦！因為香港好多市民都有買股票，今日跌市對我冇影響。」

林盛斌（Bob）：「一早開工冇睇到股市，不過呢幾日拜年身邊有專家提點我，開市就要放，依家揸住嗰啲係穩陣藍籌，影響性唔大，好幾年前試過炒股搞到冇咗幾十萬，自此就轉買磚頭。（會唔會趁低吸納？）唔會，反而會提醒屋企人小心啲，因為姨媽、姑姐都有買股票。」

林夏薇：「我都有買，不過都係長期投資，所以唔會日日去睇，當然希望個巿會好番，咁就大家都開心。（會否再入？）穩定啲先睇吓點。」

曹永廉：「近幾年都冇乜掂股票，因為之前真係輸得太多，依家咁樣跌法，之後咁上下有嘢值得入咪玩吓囉！但都唔會買多，因為之前實在輸太多。」