女星李嘉欣前晚罕有地沒現身與丈夫許晉亨及兒子等家人食開年飯，而許晉亨昨日現身馬場，依然不見嘉欣同行，問到為何太太兩天都沒有亮相？他只「哈哈」笑兩聲便離開，莫非快將有喜訊公布？

許晉亨連續兩日都一支公，莫非嘉欣有喜唔方便四圍去？

方力申被親友催婚，希望下年到佢派利是啦！

而沙田馬場昨日舉行賀歲活動，非常熱鬧，天王郭富城及鄭少秋（秋官）擔任表演嘉賓，王宗堯與女友及方力申等均有亮相。小方透露前日從北京返港，仍未跟女友鄧麗欣的家人拜年，問到父母可有催婚？他說：「個個都問我，話收埋今年利是就咪再收！（咁係咪時候？）成日諗，呢個問題比較尷尬。（諗咗就做啦！）有心！」

至於秋官透露女兒欣宜已向他拜年，提到欣宜的體重又再上升？他說：「不過好健康，佢要做曲奇生意嘅生招牌嘛！佢啲曲奇好有營養，我都買咗幾十盒，如果生意好，佢就有機會瘦，最緊要肥得健康開心！」而城城自言最重視農曆新年，問到母親可有要求帶女友回家拜年？他笑說：「唔講私人感情啦！（幾時派雙封利是？）傷風感冒嗰啲？順其自然啦！急唔嚟。」他又透露左腳十字韌帶受傷，下月底會接受微創手術，其後便會靜心休養，準備8月舉行的演唱會。