周潤發讚發嫂索到Dum一聲

神級影帝周潤發幽默指數超晒班，每次受訪總能交出令人意想不到或會心微笑的答案，功力非凡！《東網巨星》全新節目《發哥有Say》來到第五集，發哥暢談生命中最重要的女人「發嫂」陳薈蓮！

首次錫錫扮失憶

發哥與發嫂結婚近30年，一直甜蜜恩愛，出席所有活動均秤不離陀，有發哥的地方必有發嫂，提起發嫂時，他更會笑晒口滔滔不絕，自認BB要發嫂照顧，起居飲食都靠晒對方安排，否則就會變成「臭男人」！他又賣口乖讚老婆愈來愈青春，身材冇得頂！問到是否記得兩人何時第一次錫錫？發哥即搞Gag扮失憶，笑言每朝瞓醒都認不出發嫂，要由頭追求過，嘩！表面搞笑，內藏冧女最高心法，「巴打們」認真要學嘢！難怪在鏡頭後的發嫂亦忍不住甜笑！

記者：每年情人節會點同發嫂過呢？

發哥：花墟買紮花，寫張卡畀佢，錫啖咁囉！

每日重新追求

記者：記唔記得第一次同發嫂拖手同錫錫係幾時？

發哥：嘩！真係唔記得！我都有啲老人失憶癡呆喇！諗唔番，好似都冇同佢拍過拖咁喎！有時見到佢好似好陌生咁，「邊位呀？唔識佢喎！」一瞓醒就會話：「嘩！邊位呀？」

記者：覺得發嫂身材好唔好？

發哥：呢樣嘢，依家真係標青到「Dum」一聲啦！做咗運動之後，真係容光煥發，青春咗幾十年，後生咗好多。

記者：係咪你感染發嫂做運動？

發哥：唔係！係倒番轉頭，佢搵個教練訓練我！佢係我恩人嚟！

記者：做錯嘢嘅時候點氹番發嫂呢？

發哥：唔講嘢啦！唔講嘢係最大懲罰。