無綫小花龔嘉欣去年有五套劇集播出，絕對是豐收的一年，將時間放在工作的她雖感情空窗，但唔恨拍拖，準備2016年繼續搏命工作，望今年成為樓奴！文：雲妮

已單身數年的龔嘉欣，唔恨拍拖結婚，目前只想專心工作。

龔嘉欣目標是賺錢買兩個物業和希望今年陪父母去旅行，認真孝順！

龔嘉欣曾與鄧健泓拍拖，其後與許家傑傳過緋聞。

龔嘉欣表示與吳業坤現階段都不適合拍拖，因大家都處於工作搏殺期。

無綫小花龔嘉欣入行7年，去年密密做冇停手，終見成果，單單是2015年就有《水髮胭脂》、《愛．回家》、《無雙譜》、《張保仔》及《刀下留人》五套劇集出街，她直言是豐收的一年，雖然未有休息，但樂在其中：「依家反而冇工作個人會不安，舊年真係令我好滿足！」她尤其滿意《刀下留人》的角色「祝小滿」：「呢套劇係我入行以來拍得最滿意嘅一套，角色要喊好幾次，每次壓力好大，因為情緒一定係第一次爆發得最好，要好好把握，而且同楊明熟，幾有火花！」

對緋聞耿耿於懷

嘉欣最近令人最深刻的新聞，莫過於與吳業坤的「姊弟戀」，但她坦言事件令她唔開心：「最唔開心就係講到我追佢咁，講到好似我以前唔接受佢，但係佢攞獎之後，就好似要佢接受我咁！」嘉欣指他倆已認識數年，一直是好朋友，對於傳緋聞大感無奈之餘，也擔心家人不快：「屋企係福建人，思想比較傳統，都怕佢哋誤會。」入行7年的嘉欣坦言性格不適合在娛樂圈發展，因緋聞會令耿耿於懷：「好多年前，同周國賢拍嘢，有報道話我半夜敲佢房門，事後我都怪周國賢點解唔解釋，我真係冇做過，但係就寫到我有做咁，都已經咁多年，依家仲會有人講，呢樣嘢我好介意，我係女仔嚟！」

戥姚子羚攞女配開心

已單身幾年的嘉欣，視現在為工作搏殺期，未有想過何時拍拖結婚：「呢樣嘢真係冇得諗，要嚟就嚟啦！以前冇拖拍會覺得好悶，但依家單身幾年，就覺得可以更專心去工作，反而唔係成日心掛掛咁！」至於會否考慮吳業坤？她說：「唔係話邊個揀邊個，要一齊就自然會一齊，佢係一個好努力嘅人，但我覺得現階段我同佢都唔係適合拍拖嘅人，大家都係工作搏殺期！」談到好友姚子羚去年在台慶頒獎禮中奪最佳女配角，嘉欣表示當晚她「喊到收唔到聲，開心過自己攞！」但她未有羨慕子羚，也沒想過自己有否機會奪獎，認為適當時獎項就會送到手上。

今年嘉欣會再加快腳步工作，賺錢讓家人的生活過得更好：「2016年希望儲多啲錢，買樓，我目標係買兩個物業！」也希望今年可抽空與家人去旅行，陪陪父母，自己2月前的檔期已滿，希望2016年繼續忙個不停，工作接踵而至。

場地： EL Dining

化妝：Sammy Lam@gardenia