「宇宙天后」鄧紫棋（G.E.M.）回港舉行簽名會，並逐一破解傳聞，她指每星期的緋聞「日新月異」但冇個真！提到好友何超蓮被霍啟山狂追，自知衰多口的G.E.M.即封口：「如果我再爆佢啲嘢佢會打我！」

豪派六位數利是的G.E.M.將留港度歲。

G.E.M.難得在港舉行簽名會，粉絲即熱情追捧，排隊食風都肯制！

穿紅色短貼身衣的鄧紫棋，昨日於香港舉行新碟簽名會，大露小蠻腰，在內地人氣一時無兩的G.E.M.，成功吸引近五百名粉絲捧場。她表示上一張碟已是2012年，三年間偶有活動與粉絲見面，當得知粉絲為見她一面而排隊食風時，令她十分感動！

暗示單身望人追

提到桃花暢旺，近日與內地歌手華晨宇傳緋聞，G.E.M.說：「唔知點解個個星期都有呢啲新聞，冇一個係真，私人生活每星期都畀人講，所以依家唔講咁多，大家鍾意講就講。」又否認撬好友JW（王灝兒）牆腳，問到現時是否單身？G.E.M.則迴避問題，突然大講新年願望，問到可有人追求？她說：「順其自然！呢個都係我其中一個願望。」提到好友何超蓮傳被霍啟山力追，她即繼續遊花園：「如果我再爆佢啲嘢佢會打我，佢成日叫我小心啲講嘢！」

派利是「冇人收」

另外，G.E.M.表示會留港過新年，並會派六位數利是：「其實我18歲嗰年都開始派，但嗰陣太細大家唔敢收。」對於有指內地歌手韓紅誤以為她是內地歌手，她笑說：「證明我啲普通話呃得吓人。」

文：音樂組

攝：司徒國榮