周潤發新正頭潮玩魚蝦蟹

神級影帝周潤發趁猴年將至，向一眾《東網》觀眾拜年，祝願大家身體健康、事事順意！發哥在《東網巨星》全新節目《發哥有Say》第四集透露新一年大計，永不言休的他希望維持每年兩部電影的產量，問到新正頭有何節目？他笑言會與好友玩「魚蝦蟹」！

周潤發手持利是向大家拜個早年，希望大家身體健康，龍馬精神！

賭神周潤發不但在戲中鍾意玩兩手，原來現實中都會小賭怡情。

周潤發將與王晶再度合作，令人期待！

明日是大年初一，神級影帝周潤發透過《東網》向全港Fans送上祝賀說話，他說：「各位朋友！恭喜發財呀！祝大家猴年龍馬精神、身體健康呀！恭喜恭喜！」發哥曾說過新正頭會繼續進行其最愛的運動－行山，又笑言貪初一冇人行，可獨霸山頭做「山寨王」！早前他在北京接受《東網》專訪，提起行山即滔滔不絕，分析多條山路的難度，更教現場人士跑姿及換氣方法，非常親切！發哥表示今年新春除了行山，亦會招呼好友回家開「魚蝦蟹局」，一於在歡笑熱鬧中過年！

Keep住每年兩部戲

發哥去年已「登六」（60歲），古語有云「六十而耳順」，而他確實已看透世情，樂觀面對所有事，問到新一年大計，發哥選擇隨遇而安，遇到適合的劇本會繼續拍戲，永不言休，希望維持每年兩部戲的產量，並透露將再與導演王晶合作拍攝新片，但並非《賭城風雲》系列，而是全新動作喜劇，2017年將繼續看到發哥的新作，實在是Fans之福！

記者：今年過年會點樣過呀？

發哥：都係喺屋企好似平時咁，但會多咗啲朋友嚟，有啲魚蝦蟹局咁啦！

記者：猴年有冇咩心願？

發哥：最緊要自己身體健康，呢個世界唔好咁多災害，依家天氣變化好異常，最緊要大家身體健康。

記者：自己工作計劃係點？

發哥：順其自然啦！有人請你工作咪做囉！又或者角色啱，你喜歡就做囉！

記者：舊年發哥拍咗兩部戲，係咪都會Keep住呢個產量？

發哥：拍太多身體都負荷唔到，你話80年代仲後生時就得啫，依家就審慎啲，一部還一部啦！