無綫咪神高海寧（高Ling）前晚與新崛起的「腿神」王卓淇出席晚宴，高Ling雖然包到冚，但逼爆身材依然玲瓏浮凸，王卓淇則索性短裙示人，大晒煞食長腿，齊賀新劇高收視！文：影視組

高海寧穿冷衫包到冚，不過美好身段依然一覽無遺。

王卓淇穿短裙繼續晒本錢，同咪神高Ling鬥一番！

《愛》劇一眾演員齊齊飯敍。

高海寧、陳智燊（Jason）、王卓淇、小儀、謝雪心及C君@農夫，前晚齊集九龍城出席劇集《愛情食物鏈》演員晚宴，穿針織衫的高Ling雖然包冚美好身材，但玲瓏浮凸的身形依然逼爆，與以短裙仔晒腿示人的王卓淇鬥搶鏡！

唔怕影響形象

高Ling指不捨得劇集完結：「差唔多播完，我都有留意網友評價，有網友話我角色賤，又話『真人係咪都咁賤』，不過我唔驚影響形象！（情人節有咩節目？）會返南京探婆婆。（婆婆冇催你帶男朋友見佢？）我一個返去都OK，其實都冇咩特唔特別日子，如果有拖拍就日日都開心。」

至於在劇集中頻頻晒腿引起網友注意的王卓淇說：「其實係角色需要，我都有上網睇番網友Cap圖，好靚！我都會偷圖。（拍羅鈞滿摸你黑絲腳覺尷尬？）尷！嗰場係我人生第一場戲，一拍戲就拍呢場戲，嚇死我！我叫自己盡量放鬆，其實佢冇摸到我，係凌空！（下次拍劇再大膽？）可以呀！大個女啦！」

Jason咀戲嚇呆老婆

Jason大爆未婚妻宋熙年見他與高Ling錫嘴不懂反應：「因為現實中佢兩個都熟，但喺電視入面竟然錫，佢唔識反應！（佢嬲你唔知咋？）唔係，佢係覺呢個組合Kiss好奇怪，佢一下子入唔到戲。」