裕美為了演出音樂劇，近日不停綵排、練舞兼記台詞，忙得不可開交，問到會否擔心影響家庭生活忽略老公，她笑言一向都唔理，婚後自由度很大，自認「仲後生」，會繼續工作！

裕美笑言一向唔理老公，做音樂劇緊要啲！

徐偉賢（左起）、伍綺玲、黃嘉威和裕美合演音樂劇，綵排時笑聲不斷。

裕美與徐偉賢、黃嘉威及伍綺玲即將演出由焦媛執導、高志森監製的音樂劇《囍氣洋洋》，劇中裕美與徐偉賢飾演一對兄妹，角色調皮，經常鬥氣和整蠱老竇黃嘉威。裕美表示過往有演出舞台劇的經驗，但今次戲份比較多，加上顧及歌舞時又要兼顧戲份和台詞，而且喜劇中間夾住不少笑料，令她綵排時不時大笑：「本身我好鍾意跳舞，唯獨係一路跳舞一路講對白有啲難度，腳同身體要顧及節拍，對白又唔可以講錯。」

愈做愈鍾意

婚後依然活躍幕前，問到會否擔心忽略家庭生活？裕美笑說：「不嬲都唔使理，好自由嘅！我仲好後生咋！會繼續做，舞台劇愈做愈鍾意做，因為舞台劇冇得NG，好有挑戰性。」

翻唱徐小鳳金曲

徐偉賢則表示劇中會自彈自唱，但舞蹈亦不能忽略：「我之前演出都有跳舞嘅，所以有經驗打底。」而專業歌手伍綺玲表示戲中共有二十多首徐小鳳的名曲，她將獨唱三首，問到有否難度？她說：「我本身喺歌詞上要花啲工夫，因為過往比較少唱佢嘅歌。」首次演舞台劇的她，對能與一班專業的舞台劇演員合作感到開心。

文：影視組