神級影帝周潤發連續第三年現身賀歲片檔期，為Fans帶來歡樂，今次《賭城風雲III》繼續玩群星拱照及集體回憶，發哥分飾的「贏盡天下無敵手」石一堅及賭神高進再度同場，Fans聽到都興奮！對於外間看好票房能收逾15億元人民幣，在《發哥有Say》中他自承處之泰然，並表示拍戲志在享受，對金錢沒有甚麼追求。

周潤發希望各套賀歲片都有好成績。

影帝周潤發的1989年電影《賭神》堪稱經典，前年發哥與導演王晶再度合作賭片系列，但發哥改為飾演「贏盡天下無敵手」石一堅，《賭城風雲》最後一幕，賭神高進「真身」出場，令Fans集體回憶湧現，今次《賭城風雲III》石一堅及高進更會齊齊對抗奸角張學友，兩位發哥同場叫人期待！

發哥早前在北京接受專訪時亦大讚《賭III》笑料處處，而且集齊搞笑、友情、槍戰、賭枱比併等元素，問到票房期望，謙虛的發哥表示不敢多想，希望與對手周星馳、郭富城的新片均有好成績。

順其自然

記者：今次《賭城風雲III》，有個賣點係高進同石一堅同場，你覺得呢個Gimmick如何？

發哥：某個程度上石一堅唔夠張學友鬥嘅時候，就出現高進救急，江湖救急，高進聞到學友陣除，就出嚟頂住！咁石一堅唔係賭神嚟嘅，高進先係賭神，演繹上都唔會難嘅，賭神已經有個Mode，石一堅就搞笑啲，冇賭神咁Cool。

記者：今次有咩必睇位推介？

發哥：多咗啲香港80年代經典場面，例如《監獄風雲》、許冠傑歌曲，呢一套電影有幾場懷舊嘅戲都幾得意。

記者：拍攝幾個月，有冇邊幕係最難忘？

發哥：有場戲我失憶之後，張家輝喺監獄度用啲法術，用武林秘笈救我係幾好笑！但救極我都唔醒。

記者：票房方面，老闆于冬話有信心收15億元人民幣，發哥你點睇？

發哥：呢個我唔識睇，順其自然，舊年有10億，如果按照佢哋所講，螢幕每年都增長幾千個，加加埋埋，應該都有，希望啦！要睇天時地利人和，今次對手都幾強！有《西遊記之孫悟空三打白骨精》、周星馳嘅《美人魚》，仲有《功夫熊貓》，應該幾熱鬧！觀眾睇晒都冇咩所謂呀！平分天下嘛！

敬業樂業

去年八月，美國權威財經雜誌《福布斯》公布2015年度全球最高收入男星排行榜，發哥被指收入約1.4億港元，排名第24位，撼低不少荷里活巨星，非常威水！曾笑言財產交予太太保管的發哥，講過出街不帶現金，對金錢亦沒有甚麼追求，反而更享受工作的快樂。

記者：舊年發哥你打入福布斯收入榜第24名，心情點？

發哥：咁誇張？但呢樣對我都唔係咩鼓舞，工作係我分內事，就係因為我鍾意喺片場嘅感覺吖嘛！你賺幾多片酬，你都用佢唔到，我志在喺片場享受，第幾名其實冇咩意思。

昨日有指周潤發夫婦有一名養子，對此，周太陳薈蓮回應：「唔係事實嘅嘢，唔回應。」另外，有指該養子是周潤發姪仔，但事實是外甥。

文：陳偉立北京直擊

攝：秦健輝