洪永城日前被拍到與「發電機」蔡思貝跑步，有指女友唐詩詠怒火中燒。不過，詩詠昨日向男友派定心丸，指跑步很平常，又笑言下次加入一齊跑便相安無事。

詩詠表示事前知道洪永城與蔡思貝一起跑步。

洪永城表示農曆新年會到詩詠家拜年。

陳庭欣（左）與王君馨錄影時性感跳舞賀歲。

唐詩詠、黎耀祥、黃宗澤、陳庭欣與王君馨等前晚錄影無綫賀年節目《保良金猴賀新春》，期間大唱賀年歌及玩遊戲。

擘髀係拉筋

對於男友洪永城日前被拍到與蔡思貝一起跑步，詩詠似乎未有把事件放在心上，問到農曆新年可會到男友家拜年？她說：「未知，佢都開始放假，睇吓大家得唔得閒。（你講到好似分手咁款！）其實佢屋企人唔喺香港啫！（洪永城同蔡思貝跑步激嬲你？）跑步好正常，我下次Join埋佢哋就冇事。（男友有同你解釋？）呢啲係正常運動。（對佢有信心？）冇乜特別。（思貝擘大個髀喎！）拉筋嘛！嗰日我唔得閒，知佢哋去跑步。」

唔使跪玻璃

而洪永城昨日出席活動時表示，農曆新年將與詩詠互相到對方家拜年，問到送甚麼禮物時，他笑說：「珍藏版唐詩三百首得唔得？（見過家長？）有食過飯。」談到被拍到與思貝跑步，事後有否向詩詠跪玻璃謝罪？他說：「梗係冇，佢事前都知道，有叫佢一齊，不過佢嗰日有嘢做。（佢話下次跟埋？）係啦！要逼佢做運動。」

文：影視組