男神王宗堯昨日化身出租車Uber星級司機接載幸運乘客，當中三名女乘客High爆瘋狂自拍，並大讚其服務冇得頂！提到早前有Uber司機被捕，宗堯直言不怕有警員放蛇：「睇吓重案組得唔得閒囉！」

王宗堯穿上西裝化身出租車Uber星級司機。

王宗堯接載三名女乘客，三人見到司機是男神即冧爆。

王宗堯獲女乘客送上自製炸油角兼翹手合照，又與男乘客雙雙舉V。

王宗堯昨午參與慈善活動，化身出租車Uber一日星級司機，由大埔工業邨出發，遲遲未有Order，他決定駛入市區博「開齋」，經過黃大仙天馬苑附近終有一名男乘客「召喚」，他順利將乘客送抵尖沙咀廣東道，並送上大會禮物，該乘客對宗堯的服務相當滿意，大讚「六星級」！其後宗堯到尖沙咀麼地道接載三名女乘客，三人見到司機竟是明星即興奮狂叫，宗堯體貼地為三人開車門，她們冧樣盡現，並送上自製炸油角，上車前及落車後均圍實宗堯瘋狂自拍！

唔驚放蛇非挑戰法律

談到早前有Uber司機被捕兼罰款停牌，宗堯表示冇有怕，力撐Uber對司機及乘客均有保障：「Uber係全球性機構，曾經喺另一國家有第三者保險Claim過，如果有咩事，相信佢哋會出面解決。（你有冇了解有冇？）佢哋有同我提過，相信呢個服務係絕對安全、有保障。（怕唔怕警察放蛇？）嘩！咁我非常幸運！若果咁做係幾好，又幫到警隊宣傳證明做嘢有效率，咁大單新聞，亦幫到公司，相信我呢個星級司機畀星級警察放蛇，佢哋都會派星級律師幫我打，咁睇吓重案組得唔得閒囉！」他澄清並非挑戰法律，但認為社會應接受改變。他自言對駕駛技術有信心，因常接載父母及模特兒女友Christy（黎紀君），更為剛考到車牌的女友「補鐘」：「帶佢去靜嘅地方，睇吓佢泊車，訓練到我耐性，佢膽係OK，其他再練囉！」

義務性質冇酬勞

Uber發言人表示宗堯是以義務性質參與慈善活動，沒有收取酬勞，昨日的乘客是網上活動幸運兒，每位幸運兒要捐出68元予香港失明人協進會。Uber發言人又指所有Uber行程均受保險保障，所有Uber司機夥伴包括王宗堯，除持有第三者保險外，若司機夥伴的保險已失效或因任何原因未能兌現，Uber的環球保險亦會提供有關保障。

律師黃國桐認為法庭剛判決兩名Uber司機罪成，如今Uber高調找王宗堯宣傳，明顯是挑戰本港執法者及法律，做法不負責任：「今次有幫王宗堯買第三保險，係咪代表都有為所有Uber司機買呢？今次活動又涉抽獎、又捐款，好似『隔咗幾重山』，警方要追究違法有一定難度。」警方發言人則表示現行法例規定任何人在道路上使用汽車，或致使或允許任何其他人在道路上使用汽車，除非就該人或該其他人對車輛的使用已備有一份有效和符合該條例規定的第三者風險保險單，否則即屬違法。警方重視涉及非法出租或駕駛汽車載客取酬的情況，會繼續採取針對性執法行動打擊相關罪行。

文：影視組