朝新一代影壇「打女」進發的全職模特兒張可義（Emily），為力證有姿勢有實際，幾個月前開始學打泰拳，更因而獲導演賞識，邀請她參演與打拳有關的電影。她視巨星楊紫瓊為偶像，亦不怕變得太Man嚇走男士，笑言想向靚仔打拳教練展開追求！

學習泰拳數月的張可義踢起上嚟有板有眼，難怪被選中演打女。

咪睇張可義好似好Man，但原來拍拖即變黐身小女人。

張可義自爆睇中靚仔教練，連戴拳套都望到實。

張可義以楊紫瓊為目標，決心以打女形象在影壇殺出。

要在娛樂圈發展，包裝非常重要，愛吃的張可義亦因而經常做運動Keep Fit：「最近想Train番啲線條同肌肉出嚟，所以開始學打拳，而且身為女仔打拳畀人感覺都硬淨啲，加上我想向打女路線發展，學定啲相關動作相信對我有幫助，嚟緊更加會拍一套有關打拳嘅戲，導演都係見我有打開拳先畀呢個機會我，係我第一次拍戲！」

曾想過放棄

Emily表示楊紫瓊是她的終極目標：「佢真係好型，打得好勁！我覺得佢由動作女星變成巨星，Keep得咁好而且一路進步，令我好敬佩！」但原來她曾半途而廢：「以前都有跟私人教練學過幾堂，嗰時打得好差覺得冇乜天分，所以停咗一排，最近先開始學番，依家打咗幾個月，每個星期都Keep住上兩堂。打拳針對腰同臀部肌肉，個Pat Pat會好Firm，人魚線會好快浮番上水面！」她又透露將來學有所成會考慮參加比賽騷拳技：「需要一段長時間鍛煉，因為依家都仲係初學，未敢挑戰住，但我都想喺泰拳上發展！其實擔心過工作上有影響，但打拳真係抒發壓力嘅好方法，所以我會繼續打！」

唔愁冇人追

提到感情問題，Emily笑言不怕男士嫌她太Man，更自爆暗戀靚仔教練：「搵男友我真係完全唔擔心，教練真係好靚仔，我都等緊機會向教練主動出擊，哈哈！不過我覺得好多男仔都欣賞型啲嘅女仔，喺拍拖上我對做唔做主動都冇乜所謂，如果雙方都有意思就唔需要邊一個做主動，暗示吓就知啦！我其實會驚啲特別大隻嘅男士，感覺上冇咁親民，而年紀對我嚟講就冇上限，但有下限，個下限係唔可以細過30歲，我唔鍾意姊弟戀，因為我覺得女仔早熟，同啲年紀較細嘅男仔一齊會唔太啱傾，我未試過同細過自己嘅男仔一齊，同年紀就試過。」

後記：打女想同居！

問到拍拖跟平日有何分別？Emily說：「我已經畀人定格咗唔係啲嗲嘅女仔，我拍拖嗰陣其實好黐身，但應該冇乜人有機會睇到。而且工作比較忙，黐身極都有限，都唔會驚嚇走人嘅。我會係比較易同居嘅人，因為我嘅職業一定會令我同另一半少見，夜晚食飯都難，所以住埋一齊可以見多啲，可惜到依家都仲未有呢個機會啦！」

場地：ATMA Fitness Center

文：陳丹　

攝：倪立煌