樂隊RubberBand（RB）自認過去盲塞，卻不願再停滯不前被框住，故在新碟拋開包袱向前行！現場演出對樂隊而言相當重要，RB亦希望爭取機會唱Live，累積更多實戰經驗！ 文：音樂組 攝：劉智源

入行多年的RB決定拋低過去的包袱，不再故步自封！

RB乃音樂頒獎禮的常客。

能靠音樂維生，RB已感滿足。

近日推出第八張唱片的樂隊RubberBand，曾考慮以「Gravity」及「Give」作為新碟主題，惟最終仍選擇將碟名定作《Gotta Go》，全因為他們不想再原地踏步：「上隻碟《Frank?》問咗自己好多問題，今次做嘅時候好多都未有一個實在嘅答案，最後用呢個名係因為有答案又好，未知出路又好，都要嘗試去行，唔係就永遠塞住喺度。」

爭取唱Live

為遠離困惑的狀態，RB決心拋開包袱：「以前覺得一定唔會搵人填詞，又或者唔會唱其他語言嘅歌，今次我哋都嘗試克服呢啲框框！（之前點解抗拒？）盲塞囉！」他們下一步最想衝破的框框是爭取更多Live演出：「好似一個識功夫嘅人，你平時冇練，以為好打得，但其實你冇實戰經驗，呢個就係我哋正正需要面對嘅嘢。」

夠生活已感滿足

過去一年橫掃音樂頒獎禮多個獎項的RB，總算得到大家的肯定，收入雖未有大幅增加，惟他們已感滿足：「足夠生活但又唔會發達，有時未必所有工作機會都適合一隊樂隊，但唔可以話艱難，因為好多嘢已經好滿足，我哋仍然可以用呢個工作去維生！」

難覓新Band房

現今樓價高企，RB仍未物色到新Band房，講到香港人捱餐死為上樓，他們亦表示離置業夢很遠：「過去嘅香港只要你勤力啲就可以有瓦遮頭，但近十年真係距離我哋好遠，積極啲諗，無謂為一塊磚頭而覺得人生有陷！」

場地：紅磡都會海逸酒店 化妝：Yen Lai

髮型：Mad Ho@IL COLPO TST

服裝：Denim&Supply Ralph Lauren