創作女新人丁悅推出首張大碟，她習慣在「洗白白」時攞音樂靈感，曾因渴求靈感而一日沖足四次涼，幸好夠「肉地」未致浸到皺皮。而新歌《新婚快樂》是首出席舊情人婚禮的慘情歌，阿丁提醒大家別只看歌名而錯用在婚宴上便大件事！文：音樂組　攝：劉斌

丁悅搵創作靈感的方法，認真特別！

看到別人的求婚派對，丁悅即興奮起來！

丁悅笑言自己皮嫩有肉地，唔驚沖涼沖到皺皮！

丁悅新碟共有十一首歌，其中佔了一半是其作曲作詞之作，自小喜歡音樂的她有獨特的創作靈感方法，她笑說：「就係沖涼喇！一沖涼就好易靈感到。（點發現呢個方法？）我都唔明！沖涼特別多歌哼到出嚟，之前一首我同李蕙敏、林曉培合唱嘅《女人本能》真係壓力下完成，嗰次我真係狂沖涼下完成！（最誇張一日沖幾次？）試過一日沖三、四次攞靈感，好彩我後生，皮膚仲好嫩，又有啲肉地，所以唔會浸到皺晒皮。」

講求婚High到爆

受訪期間，阿丁得悉現場的酒店工作人員正準備着一個神秘求婚派對，她顯得分外興奮，問到是否很憧憬這個畫面？她說：「係呀！雖然依家事業為重，但由細到大婚姻係自己好憧憬、好美好嘅事，求婚我覺得係好Sweet，加上我都幫過朋友手參與求婚，見證過，真係幾開心！」阿丁重視求婚，將來男朋友豈不很大壓力？她說：「因為我反而對婚禮冇咁大要求，唔鍾意大排筵席搞到大龍鳳咁，請啲重要親友就可以，相反求婚就想多啲朋友一齊見證，因為求婚嗰下係好肯定性嘅一幕，係好感動。」

新歌唔啱婚禮播

談到新碟中的歌曲《新婚快樂》，阿丁笑說：「呢首係一首英文改編歌，係講去外國參加舊戀人嘅婚禮，原本叫《異國遊人》，後來公司幫我改咗歌名叫《新婚快樂》。（新婚唔啱聽呢首歌？）係呀！唔好齋睇歌名，我試過去婚禮有人竟然用首英文歌《Saying All My Love For You》，我聽到都嚇親，因為係首講第三者嘅歌，所以婚禮用錯歌非常大鑊，真係要了解吓歌詞意思先揀，唔好只睇歌名。」

場地：Hotel SAV

化妝：Yennie Hung@Freshstar-Beauty

髮型：軍@mammals