關宛珊表示《純屬意外》及《城寨英雄》兩套劇都考驗她的演技，前者要做奸角，後者就需要爆喊！曾兼職舞蹈員的她又表示想挑戰歌舞劇，展示能跳能唱又能演的一面！文：陳丹　攝：吳文聰

關宛珊一向予人甜美可愛形象，新劇竟然大反轉挑戰演奸角。

關宛珊（Kimmy）一向予人乖乖女的感覺，但她將在新劇《純屬意外》首次飾演奸角：「今次係我第一次做奸角，我同啲同事、朋友講，佢哋都話估唔到！因為平時多數做秘書呢啲乖角色。」

Kimmy亦為《城寨英雄》客串了一集，更要在劇中釋放爆喊本能：「入面要做袁偉豪老婆，講佢畀人打死，我要拍啲好激烈嘅喊戲，嗰陣好好彩順利完成，而且係好難得嘅經驗！我平時都易喊，但一拍戲就變得難喊，又緊張又有壓力，而且要投入將啲劇情當係真咁演都需要時間，拍呢場戲嗰時我個腦一片空白，到導演一叫我試戲我即時入晒戲喊得好勁，由排戲到拍完全程三個幾鐘，我喊足三個幾鐘。」

想挑戰歌舞劇

不時做旅遊及飲食節目主持的Kimmy認為主持與拍劇分別很大，又表示想挑戰歌舞劇：「主持會輕鬆好多，拍旅遊節目都係玩多，只係做番自己。但拍劇所有嘢都係虛構，本身想挑戰舞台劇，但上年已經試過，依家就想試吓唱歌、或者做一個大型歌舞劇，加上以前都學過跳舞做過兼職舞蹈員。」