JW去年與A Music滿約後，獲Sunny Idea老闆Eugene賞識，她感激對方信任，隨後推出《矛盾一生》好評如潮！JW表示歌曲表達出女人默默苦等伴侶變上進的心情，唱出不少女人心聲。文：陳丹 攝：劉智源

於新歌唱出女人心聲的JW，目標想開個唱。

JW受訪表示與新公司好夾。

歌手JW（王灝兒）去年約滿黎明旗下的A Music轉簽新公司，推出新歌《矛盾一生》唱到街知巷聞，她分享歌曲意思：「首歌係收集咗好多朋友嘅故事、自己某啲經歷之後得出嘅Idea，想講啲情侶一齊好耐，男方唔識發奮，女方會好矛盾，應該等定離開呢？如果搵另一半真係要搵個好愛自己嘅，當個男人好愛你，佢會計劃埋你哋嘅將來，唔會想你哋下半生辛苦咁過，當你搵到個好愛你嘅男人嗰陣，唔需要介意同佢一齊捱，因為你哋有好明確嘅目標！兩個人一齊最重要係安全感，當女仔有安全感就唔會咁矛盾，呢首歌正正係講呢樣嘢，女仔青春好寶貴，佢哋聽完首歌會好有共鳴。」

感激家人支持

JW感謝老闆Eugene給予肯定，讚公司方向與自己夾到絕：「好多謝佢好相信我，亦好相信我嘅聲音！」她未有忘記在A Music得到的一切：「從來唔覺浪費咗時間，靜咗嗰幾年都冇放棄，一路增值自己，學唱歌跳舞又做Gym。當然曾經有諗過呢行仲值唔值得我留喺度，但屋企人同好朋友都支持我！」

與Leon同台好榮幸

不諱言夢想開個唱的JW，深明不能心急：「我好Proud of喺A Music嗰段時間，經歷咗好多嘢，同Leon同台真係我榮幸，又同Janice（衞蘭）合唱，仲有雷頌德畀好多機會我！最難忘係上紅館唱歌同《男人信什麼》拎到金曲金獎，但嗰陣第一年入行，未識真正珍惜上台攞獎個感覺，對我嚟講係好唔真實嘅事。自己有目標，做歌手一定想開騷、開巡唱，但係要儲多啲好歌之餘，亦要配合天時地利人和，所以依家Focus喺音樂上逐步逐步行！」

場地：Oldish　髮型：Hin Wan@il colpo