年過50的「美魔女」羅霖膽粗粗闖樂壇，當初慘被兩子要求關房門才可練歌，到現在歌藝備受讚賞，駁髮的新形象又大獲好評，令她樂於繼續做「潮魔女」一脫熟女味。文：音樂組　攝：劉斌

羅霖為做歌手換了新形象，馬嘉均都讚索。

羅霖和馬嘉均之前推出合唱歌，大獲好評。

羅霖有寶貝仔力撐，是最好的鼓勵。

去年底羅霖初試啼聲與歌手馬嘉均合唱《姊弟愛》，並在新城頒獎禮獲得合唱歌曲獎項，雖然有獎項鼓勵，但羅霖未打算再出新歌，她說：「唔繼續住，做歌手花嘅時間好多，都係留番畀佢哋啲專業歌手啦！（仲諗住新一年會出新歌？）或者明年先再唱啦，要我即刻再做新歌就唔得啦！因為有其他工作同生意要兼顧，而唱歌真係需要唔少時間去練。」

錄音緊張到肚痛

她表示當日得悉要唱《姊弟愛》這首歌，下了不少苦功，除跟麥潔文學唱歌，還特別買了一套卡拉OK，她笑說：「我屋企一直冇呢啲機，我亦冇去唱K嘅，所以叫我唱歌，都驚應付唔到，錄呢首歌時仲緊張到肚痛，以前讀書考試就會驚到胃抽筋，可想而知我錄音時係幾咁緊張。」

寶貝讚好最大鼓勵

談到三位兒子可支持她唱歌？羅霖說：「最記得第一日我收到首歌嘅Demo，拎咗返屋企，當我跟住唱嘅時候，兩個細仔喺屋企，佢兩個叫我『阿媽閂房門啦！』，心諗唔係唱得咁難聽嘛，兩個仔就解釋係唔習慣聽我唱歌啫。後來佢哋聽到我首歌製成品，都有讚番我，有佢哋讚真係好大鼓勵。」

為做歌手，羅霖亦換了新形象，除服裝打扮更潮外，亦駁上粉紅色假髮，她笑說：「我兩個仔話鍾意我依家個Look喎，身邊朋友都話潮啲好睇啲，咁我都鍾意呢個新形象，都會Keep住嘅。」

場地：帝苑酒店

化妝：Peppy　髮型：Jay@Hair　服裝：IIJIN