「魔鬼食神」旨呈炮製邪惡菜式

雖說「君子遠庖廚」，但享樂團的旨呈和Paul除了是音樂狂熱外，亦愛在廚房自成一國，兩人更分別擔任廚藝界的「魔鬼與天使」，各自鑽研最邪惡和最健康的食譜。經營餐廳的成員Joe開玩笑說，隨住城市人變得追求健康，旨呈的肥膩菜單變得「冇人吼」，要轉請Paul做大廚！文：音樂組攝：黎志輝

享樂團五子除了夾Band外，亦愛下廚為樂。

Bass手Paul身為健身教練，最注重健康飲食。

主音旨呈是魔鬼廚神，不時向成員進貢邪惡美食。

煙肉以橫直方式包圍麵包，中間加入適量即溶芝士，再以牙籤固定。

將固定好的煙肉麵包，用平底鍋以中火慢煎至金黃色即可。

最後放入預先預熱了220度的焗爐，焗10-15分鐘。趁熱切開，流心芝士煙肉多士製作完成。

先將切邊麵包壓扁，再塗上適量Cream Cheese及士多啤梨粒，將麵包捲起。

將麵包卷沾上蛋汁，再用平底鍋以中火慢煎至金黃色。

灑上適量肉桂粉及砂糖。

用餘下的生果伴碟，並灑上適量玫瑰露點火。

樂團享樂團向來以「樂」字行頭，五子愛下廚，主音旨呈和Bass手Paul更是大廚，兩人的烹調風格超級極端，簡直是一個魔鬼、一個天使！「魔鬼廚神」旨呈自稱頂級食家，本身擁有一個專門分享「地獄級食譜」的YouTube頻道《食神再歸位》，最近網上流行的Chocolate Spheres、彩虹拔絲香蕉、超級無敵巨無霸等都是他的研究成果之一。旨呈卻不時被成員投訴經常進貢邪惡美食，致使他們要不斷Keep Fit瘦身，旨呈亦自認有做好「魔鬼」的職責：「我自己煮咗反而唔會食，都係介紹畀人睇吓啲美食有幾邪惡、幾吸引，同埋我會研究啲簡單啲嘅製作方法，等大家睇完都可以一齊落手煮，感受吓有幾邪惡。」

與旨呈相對的則是滿身肌肉兼經營健身室的Paul，因為職業的關係，他是樂團中最注重健康的一位：「一般都比較少食濃味嘢，加上係健身教練，自己作為榜樣都食得健康啲，有時都會喺舖頭煮嘢食，一日三餐都可以自己搞掂。」成員更踢爆Paul是「焗爐能者」，善用焗爐的程度可以用出神入化來形容，能夠將簡單的雞柳和西蘭花等焗成健康美食。而Paul的首本名菜是在網上風靡一時的「番茄飯」：「我日日都煮，食咗年幾喇！有時會加啲青瓜，又會加吓唔同食材，其實直頭可以唔加油，仲健康啲！」談到緋聞女友譚杏藍可會跟他一齊煮美食？Paul即面露難色：「佢成日嚟黐餐，佢煮過啦！我都唔知點解佢可以加牛油同梅子粉落去整番茄飯，真係唔敢畀佢煮。」

Joe搵Paul做大廚

對於二人的煮食風格大不同，開設餐廳的Joe時常充當兩子的評判：「好似今次煮呢兩味菜，喺煮之前旨呈都有搵我做白老鼠，整咗一次我食先，因為我自己開餐廳，所以有時都會收到旨呈嘅建議，話有啲新嘢可以試吓擺落餐牌度。」談到旨呈的地獄餐單在舖頭可受歡迎？Joe尷尬地說：「旨呈煮嘅通常都係偏肥膩，依家啲人都比較追求健康，結果真係睇多過買，我反而應該試吓搵Paul做廚，平衡吓。」

而另外兩名成員Kenneth和Addy在隊內主力負責「食」的工作，兩人笑說：「都係食多，食完就幫手洗嘢。其實我哋都有試過想自己煮，之前有次喺旨呈度食咗個我覺得係生平最好食嘅意粉，問晒佢拎食譜落咗超市想準備買材料，一心諗住自己親自試吓，但行咗一個圈發現對新人嚟講實在係太複雜，都係下次再搵旨呈教我。」