人妻張美妮向來予人鄰家小女人的感覺，在新劇《鐵馬戰車》揸槍做「賊婆」的她表示，角色帶給她極大衝擊，令她可盡情釋放陰暗一面！

外表溫婉的張美妮首次挑戰做女賊，定必給人耳一新的感覺。

張美妮向好友「發脾氣」後速解釋，是個珍惜友情的人。

向來給予觀眾「賢妻」感覺的張美妮，在新劇《鐵馬戰車》中首次演「賊婆」的她表示，接到角色後相當興奮：「好大挑戰！同以往角色太唔同，以前全部都做小女人角色，畀人蝦、畀老公拋棄，但今次要好強勢，好有大家姐Feel。今次拍之前做得特別多功課，拍嗰陣我時刻都幻想自己就係嗰個角色，因為同本身性格太唔同，要落好多工夫，我希望拍嗰陣唔只做到表面，想內在都做到『單眼瑛』嘅內心感受。我亦睇咗好多戲學揸槍，仲買咗把氣槍練習手勢，因為今次係第一次揸槍拍戲，但呢個角色應該對揸槍易如反掌，所以我更唔可以『姐手姐腳』！」

拍畢速解釋

美妮又感激監製對她的信任，希望觀眾接受她的改變：「平時大家見我都係樂天印象，唔會諗到搵我做賊婆，所以好多謝佢畀機會，而造型上都好幫到我，一來係好Cool嘅打扮，二來因為角色係單眼，每次化完妝望到都會更投入。我拍嗰陣未Roll機都會管理情緒，尤其同胡諾言佢識咗十幾年已經好熟，一見面就會互相講笑，但呢個角色一定要Keep住心狠手辣嘅狀態唔可以咁輕鬆，有幾個場口佢未埋位嗰陣走埋嚟笑吓我，我完全黑面唔理佢跟住行開，因為我唔可以令情緒散咗，佢見到我咁都驚咗我，以為我嬲佢，我一拍完呢啲緊張場面都有同佢解釋番，費事有誤會。仲有今次第一次同林偉合作，佢平時做開大佬、黑社會呢啲角色，所以成日提點我，幫咗我好多！」

Enjoy陰暗面

而美妮更笑言這個角色帶給她甜蜜婚姻生活以外的一大衝擊：「當時結咗婚未夠一年就拍呢套劇，新婚感覺仲好Sweet，所以拍嗰陣又揸槍又殺人覺得好High，好Enjoy發放陰暗嘅一面，希望第日有更多呢種『不一樣的張美妮』嘅角色做畀大家睇！」

場地：美國餐廳

文：陳丹

攝：秦健輝