無綫藝人梁麗翹（Nicole）早前偕好友胡中慧（Sandy）及林芊妤（Coffee）等茶敍，眾人聚焦於Sandy的「36E西柚胸」，令好姊妹不禁出手狂篤！帶囡囡到場的Sandy又籲大家生個「潛質男友」陪愛女，Nicole亦盼覓得未來老公。

胡中慧以低胸T出席姊妹聚會，同B女一齊成為焦點。

梁麗翹見胡中慧的B女咁可愛，即刻心郁郁想生番個！

胡中慧以往已屬有料之人，生完身材更是一級棒！

梁麗翹早前約好姊妹胡中慧、林芊妤及蔡慧欣（Gemma）等茶敍，榮升媽咪的Sandy帶女兒Chole赴會萌到爆！當日焦點除了落在可愛B女上，以低胸黑Tee力谷36E逼爆上圍的Sandy亦非常「凸」出，Nicole笑指Sandy心口猶如「兩個西柚」，又打趣自言有一顆「整大個胸的心」：「因為佢上圍太豐滿，我哋個個都忍唔住篤佢個胸，佢一烏低身，我哋視線全部轉晒過去！」

湊B女超有愛

她指Sandy性格隨意，大情大性，但榮升媽咪後變得非常細心：「佢擔心冷氣吹親個女，又擔心個女望住個窗對眼未適應，大家都覺得佢最唔似做人阿媽，但都可以訓練到咁樣，大家都打咗個突！」談到升呢變「阿姨」，大家都耍手擰頭唔認老，Nicole說：「Sandy係咁叫個女同Auntie Coffee、Auntie Nicole Say Hello啦，我哋即刻話千祈咪叫Auntie，我哋係姐姐啫！」

呻男友零表示

她表示Sandy籲姊妹快快生細佬妹，或「Potential Boyfriend（潛質男友）」陪愛女玩，問到有否計劃生育？Nicole說：「我想生呀！但首要條件係搵一個想娶我嘅人先。（男友冇表示？）零行動！成班姊妹就覺得應該冇乜可能咁快生，不過都有問定佢生仔湊仔經驗，佢都好樂意分享，但唔知幾時先排到我哋！」

文：影視組