郭富城、羅仲謙與導演鄭保瑞昨日宣傳新片《西遊記之孫悟空三打白骨精》，三人坦言新片拍得相當辛苦，城城說：「有兩個星期要着野猴裝拍，化妝時間好長，仲要唔飲得水，因為着咗套衫去唔到廁所！（諗續集？）真係冇諗過，呢四個月真係唔易捱，塊面都冇忽好肉，每日都要黐毛同着肌肉衫，拍文戲都好似跳Part舞咁！」問到早前包場與女友睇戲的城城，會否包場請「朋友」睇戲？他說：「希望啲朋友自己包啦！新年會返香港宣傳，但大部分時間喺上海拍戲。今年除夕要工作，陪唔到屋企人食飯。（情人節喺上海？）都係工作。」

即場扮孫悟空的城城指拍攝過程很辛苦。

城城、羅仲謙與鄭保瑞派海報宣傳新片。

城城與羅仲謙送禮物給小朋友。

而與女友楊怡頻傳好事近的羅仲謙，被問到今年會否考慮結婚，他笑說：「一直以嚟都有計劃未來，覺得合適嘅時候就會將件事做得最完美。（求咗婚？）咁快？其實我依家都32歲，有計劃好正常。早兩、三年都有諗將來嘅事，覺得呢啲係工作嘅動力。（35歲前結婚？）自己冇綁死自己。（生咗仔先結？）承你貴言啦！（幾時派雙封利是？）傷風？我好健康喎！（會秘婚？）唔會，依家邊會有秘密。」