黃秋生、羅霖及邵仲衡等前晚到九龍站出席活動，集影帝、舞台劇帝及視帝於一身的秋生，日前在樂壇頒獎禮上再開金口，好評如潮，他說：「今年想搞音樂，可能係音樂會。（出碟再做歌手角逐頒獎禮？）唔喇！幾十歲，但係時候出番隻碟。（捍衞廣東歌？）有廣東歌都有國語。（點睇張敬軒攞男歌手金獎？）軒仔好嘢！（同佢慶祝？）唔使！佢陸續有嚟，愈來愈旺。」

貪玩的秋生拿着放大鏡玩！

羅霖偕細仔現身，爭取時間親子樂。

羅霖帶10歲兒子Jonathan現身，她與前夫劉坤銘就3個兒子的學費問題仍未解決：「律師會幫手搞，小朋友都覺得唔合理，但我唔想佢哋牽涉入內。我想律師幫我攞番我嘅衫、鞋等私人物件，但對方要我提供單據，我只係生咗3個仔，啲女裝衫同鞋一定係我喇！呢件事困擾我好耐，想盡快解決。（劉坤銘有陪啲仔慶祝聖誕、新年？）佢哋上次見係兩個禮拜前，為人父母分開咗，都應該定期見面！」而邵仲衡鼓勵任職工程師的同母異父細佬Lionel追徐子珊：「徐小姐好，我有叫佢追！（細佬有咩追求行動？）唔知！佢好耐之前有講過徐小姐，但佢唔知人哋係Miss HK！（畀你演嘅舞台劇飛細佬，等佢約子珊？）我老婆都冇飛，等下輪先，細佬呢排好似話忙為日本改個運動場設計。」