張敬軒先後在勁歌、新城勁爆及叱咤頒獎禮橫掃「男歌手」獎成「獎王」，昨日軒仔舉行簽唱會並將九大獎座「大晒冷」，更與情深男歌迷牽手擺甫士充滿HeHe味！ 文：音樂組 攝：秦健輝

軒仔與男Fans牽手擺出華爾茲甫士，相擁時，軒仔個樣冧到呢！

軒仔收到膠花、蠟燭和紅酒！

軒仔舉行簽唱會兼「大晒冷」獎座，大批歌迷捧場！

軒仔為新碟舉行「新港城x張敬軒『Felix-Me & Mr.Cheung』簽唱會」，吸引不少歌迷捧場，歌迷上台送上膠花、蠟燭和紅酒向軒仔表白，軒仔卻抵死聯想到「祭品」：「又膠花，又蠟燭，差個相框就齊晒喎！」其後大會安排男Fans與軒仔手牽手擺出華爾茲舞姿，男Fans情探望着軒仔時甚緊張，軒仔笑說：「簽唱會嘅開頭基味似乎濃咗少少。」

「四台四料歌王」叫緊胡

十大中文金曲頒獎禮將於本周三（後晚）舉行，軒仔在之前的三個頒獎禮先後報捷，問到「四台四料歌王」正「叫胡中」？軒仔笑說：「都想食胡，但怕小相公喎！歌曲獎會有信心啲，個人獎項就隨緣啦！」提到在叱咤獲獎時獲周柏豪吻賀，後晚頒獎禮可會給柏豪「回吻」？軒仔笑說：「隨緣啦！」

話柏豪又滑又軟攞Like

對於有聲音指新人王吳業坤的歌曲《原來她不夠愛我》只屬一般，軒仔力撐坤坤：「唔係啦！佢首歌喺YouTube點擊排第二位，幾百萬點擊好犀利，我有首國語歌儲咗五、六年先有三、四百萬點擊。」他表示現今已是網絡主導，娛樂生態已不同，他看過一篇報道指坤坤是代表一個現象，不需要一定簽大公司、花大錢宣傳：「好似我正正經經放張相唔會太多Like，但我發一條講得衰衰格格話柏豪好滑好軟就有過萬Like，新一代識善用網絡，坤坤對我哋呢啲所謂前輩係學習對象嚟！」