人氣爆燈的吳業坤獲所屬公司無綫及Neway全面力捧，2016年於電視、電影、唱片及廣告同步出擊，包括亮相無綫的藝人生活直播節目，月入更由5位數躍升至6位數，名副其實是隻「會生金蛋的雞」﹗他前晚出席唱片公司高層婚宴時獲老闆薛嘉麟夫婦相迎，風頭一時無兩！文：影視組

坤坤笑言日後會檢討衣着，以防「窄身褲事件」再發生。

一對新人帶住坤坤滿場飛，難怪有指婚宴變慶功宴啦！

吳業坤先後於無綫及電台頒獎禮「脫穎而出」，瞬間Hit爆成為人氣王。據悉其經理人公司無綫及唱片公司Neway決定打鐵趁熱，全方位力捧坤坤上位，無綫將於3月在網上推出藝人生活直播節目，有感網民對「宅男」坤坤的私生活甚感興趣，故打算邀他作首位亮相藝人，增加點擊率。

廣告合約送上門

而Neway旗下星娛樂唱片公司總經理朱浩棠（Tommy）前晚與黃美芬舉行婚宴，新郎當正坤坤「親生仔」般帶他滿場飛，讓親友集郵。Tommy忙結婚之餘亦不忘為坤坤事業鋪路，不少廣告合約自動送上門找人氣爆燈的坤坤合作，令Tommy連日電話響不停，走「平民路線」的坤坤廣告價暫為6位數，實行「密食當三番」﹗Tommy昨日接受電話訪問時坦言：「係有廣告商主動搵佢，護膚品、食品乜都有，有啲已經傾得七七八八。（話佢騷價暴升12倍？）都係嘅。（收入都暴升？）應該話以前每月5位數左右，依家接一個廣告都唔止啦！（全面力捧？）公司每年喺資源分配方面都會因應環境作出調整，佢今期Hit嘛！」他又表示今年會為坤坤舉行個唱，為2018年進軍紅館鋪路！

捧獎飯局食唔停

對於獲兩間公司力捧，坤坤昨日透過電話謙稱：「（有人氣）都係呢半個月嘅事，嚟緊會繼續做音樂，埋頭苦幹做番歌手要做嘅事，或者會去幾日旅行獎勵自己，但唔會亂用錢。（加人工？）慢慢加啩，冇問公司，我價錢合理嘅。」又透露稍後會宴請無綫劇《愛．回家》劇組及唱片公司同事食飯慶祝。另外，坤坤連日勤於更新社交網，並獲大批網友支持，他日前只是留言失眠，便獲逾200名網友鼓勵他繼續努力或氹他瞓覺。昨日又上載一段自彈自唱的短片，歌曲不斷狂Loop「My name is Ng Yip Kwan」，上載僅1小時已有逾3.2萬瀏覽次數！