現年24歲的李蘊（Renee）昨日驚爆與拍拖三年的內地銀行行長羅章冠在海南島低調「秘婚」，成為2016年圈中首位新娘。昨晚李蘊的兩位好姊妹G.E.M.（鄧紫棋）和何超蓮以全白打扮陪伴出嫁，並在Instagram公布李蘊成為「最美的新娘」。

G.E.M.更在婚宴場地拍片直擊，把李蘊和新郎的行禮過程放上網分享，片中李蘊和新郎在婚禮進行曲中手拖手穿過鮮花拱門，走到婚宴舞台上。

李蘊透過短訊回覆：「兩人已註冊了好一段時間，今天才在海南島一間酒店補擺喜宴，因為今天太忙，又要招呼賓客，所以今天不能接電話，明天才有時間接聽電話，稍後回港會補擺喜酒。」G.E.M.之後在電話笑說：「看到Renee與老公好堅定講出『我願意』三個字，自己同超蓮都忍唔住落淚，太感動啦，因為呢個Moment真係唔容易，同佢識咗咁耐，見過佢有好多唔開心，脆弱，需要畀人錫、保護同照顧時候，今日佢終於搵到屬於自己嘅幸福，我哋真係戥佢開心。」其經理人Peter表示李蘊有知會結婚一事。問到李蘊是否有B？他說：「呢樣唔知，如果係就恭喜佢，因為佢老公係好好男仔，係好歸宿。」