樂隊Mr.與環球唱片公司今年中約滿，表面和平「分手」，但傳聞雙方關係一早決裂，更傳出環球出「狠招」將Mr.掟入「雪櫃」，連環推Job，另一方面要求Mr.在餘下半年交10餘首歌，推出日期則「下落不明」，但成員Dash貫徹打不死Band仔精神大呼：「Mr.未死！」　文：專案組

有傳Mr.因不續約而遭公司「雪藏」，手停口停窮到燶！

Tom年前奉子成婚，可謂仔細老婆嫩！

Alan去年與有米女友陳雪瑩拉埋天窗。

去年10月初，樂隊Mr.與環球唱片內有暗湧並不和平。發出聯合聲明指雙方將不再續約，表面上因意見不合和平「分手」，但其實有傳環球因Mr.不續約，明知五子窮到燶亦密密推走商演，眼見合約只餘半年，環球仍不斷催交10餘首歌，但「最後唱片」推出日期不詳，10餘首作品可能淪為「廢物」。被放逐的Mr.近半年手停口停，只閒時跟着「校長」譚詠麟游走，打波踢波開聖誕P，一向錫Mr.的校長去年12月亦「雪中送炭」帶他們上廣州幫內地歌手的音樂活動做嘉賓，可惜冇錢落袋！眼見前路茫茫，Dash（譚健文）去年10在廣州開騷時爆喊，更在網上發文：「對，哭過之後就要堅強，那怕解決不了的問題，只要不再逃避瑟縮在被窩就對了。」

Tom仔細老婆嫩

Dash接受本報電話訪問時說：「自從宣布唔再續約後，工作真係少之又少，以前都會有啲倒數騷，唔知點解今年一個都冇，經濟上的確有壓力，坦白講我已經有幾個月冇畀家用，但好彩我跟屋企人住公屋，平時又唔係點使錢，仲可以維持到生活。不過最慘嗰個都係Tom（杜志烜），有老婆仔女要養。」

問到有傳公司推Job，他說：「聽聞係價錢傾唔啱。（有冇同公司傾過？）有反映過，但係都係冇乜Job！」

傳公司又要催交歌，但又不知何時出唱片？他說：「其實我哋都係想專心做好音樂，其他嘢交畀公司處理，但我哋係唔會交行貨！」距離重獲自由餘半年，Dash坦言已預咗被粉絲忘記，但保持打不死Band仔精神並鼓勵年輕人：「我想同大家講，Mr.未死，我哋仲生存緊，而且我哋一定唔會解散！大家睇表面睇Mr.星途好似好好，又有校長撐，但其實我哋同普通人一樣，都有生活壓力，我好想同年輕人講，咪咁易放棄，我哋仲有希望！」

唱片推出無期

對於種種雪藏的傳聞，環球唱片公司發言人Emily受訪時一一否認：「佢哋1月中會有一個有錢嘅Band Show，亦會有其他慈善活動。（慈善活動都有錢收？）有。」問到會否為Mr.創作的10餘首歌出唱片？她說：「未知，等公司安排。」